ئه‌نجامی وه‌رگرتنی خوێندكاران له‌ زانكۆو په‌یمانگاكان راگه‌یه‌نرا

.

 وه‌زاره‌تی خوێندنی باڵاو توێژینه‌وه‌ی زانستی ئه‌نجامی وه‌رگرتنی خوێندكارانی له‌ زانكۆ و په‌یمانگاكان راگه‌یاند، ئاگاداری خوێندكارانیش ده‌كاته‌وه‌ كه‌ ده‌توانن له‌ سه‌عات 5 ی ئێواره‌ی ئه‌مڕۆوه‌ له‌سه‌ر سایتی زانكۆلاین، ژماره‌ی نهێنی خۆیان داخڵ بكه‌ن و ناوه‌كانیان بدۆزنه‌وه‌.

ئه‌مڕۆ 8-10-2019، د. ئارام محه‌مه‌د قادر وه‌زیری خوێندنی باڵاو توێژینه‌وه‌ی زانستی هه‌رێمی كوردستان له‌ كۆنگره‌یه‌كی رۆژنامه‌نووسیدا ئه‌نجامی وه‌رگرتنی خوێندكارانی له‌ زانكۆو په‌یمانگاكان بۆ ساڵی 2019-2020 ی  راگه‌یاند.

 وتیشی: وه‌ك وه‌زاره‌تی خوێندنی باڵا هه‌وڵی زۆریان داوه‌ له‌گه‌ڵ زانكۆ و په‌یمانگاكان بۆ ئه‌وه‌ی بۆ ئه‌مساڵی خوێندن پلانی وه‌رگرتن زیاد بكه‌ن بۆ ئه‌وه‌ش توانیویانه‌ بۆ ئه‌مساڵی خوێندن رێژه‌ی له‌ 30% وه‌رگرتن له‌ زانكۆ و په‌یمانگاكان زیادبكه‌ن.

ئاماژه‌ی به‌وه‌شدا، له‌گه‌ڵ وه‌زاره‌تی په‌روه‌رده‌ به‌ هه‌ماهه‌نگی كار ده‌كه‌ن بۆ ئه‌وه‌ی ئه‌و كێشانه‌ی كه‌ له‌ وه‌رگرتنی خوێندكاراندا دروست ده‌بێت به‌شێكی زۆری چاره‌سه‌ر بكه‌ن، وتیشی: سیستمی وه‌رگرتنی خوێندكاران له‌ زانكۆ و په‌یمانگاكان ناوه‌ندییه‌"مه‌ركه‌زییه‌" بۆیه‌ ئه‌م سیستمه‌ ساڵانه‌ كێشه‌ی زۆری  تێدا دروست ده‌بێت بۆیه‌ش وه‌زاره‌تی خوێندنی باڵا بۆ ئه‌مساڵ له‌ رێگه‌ی زیادكردنی پلانی وه‌رگرتنه‌وه‌ هه‌وڵیداوه‌ به‌ره‌به‌ره‌ ئه‌و كێشانه‌ به‌ره‌و چاره‌سه‌ربه‌رێت.

دواتر له‌لایه‌ن د. خه‌تاب شێخانی به‌ڕێوه‌به‌ری  دیوانی وه‌زاره‌تی خوێندنی باڵاو توێژینه‌وه‌ی زانستی ئه‌نجامی وه‌رگرتنی خوێندكاران له‌ زانكۆو په‌یمانگاكان ئاشكراكراو رایگه‌یاند: له‌ساڵی 2019 دا 38284 خوێندكار فۆرمی زانكۆلاینیان پڕكردووه‌ته‌وه‌و 41833 خوێندكار له‌ زانكۆو په‌یمانگاكان وه‌رگیراون كه‌ 3200 خوێندكاری ساڵی رابردو واته‌ 2018 بوون و بۆ ئه‌مساڵ وه‌رگیراون و 1482 خوێندكار به‌هۆی خراپ پڕكردنه‌وه‌ی فۆڕمی زانكۆلاین یان هه‌ڵه‌ پڕكردنه‌وه‌ ناویان نه‌هاتووه‌ته‌وه‌و له‌ هیچ زانكۆو په‌یمانگایه‌ك وه‌رنه‌گیراون، كه‌ رێژه‌كه‌ی له‌ 4% سه‌رجه‌م ئه‌و خوێندكارانه‌یه‌ كه‌ فۆڕمیان پێشكه‌شكردووه‌.

 وتیشی: بۆ ئه‌مساڵی خوێندن واته‌ 2019-2018، رێژه‌ی وه‌رگرتن له‌ زانكۆو په‌یمانگاكان له‌ 74% بووه‌و كه‌ له‌چاو ساڵانی رابردوو وه‌رگرتن له‌ 30% زیاد كراوه‌، بۆ ئه‌مساڵیش 38284 فۆڕمی زانكۆلاین پڕكراوه‌ته‌وه‌ كه‌ رێژه‌ی پارالێل له‌ 8% بووه‌.

ئاماژه‌ی به‌وه‌شدا، 3052 كورسی به‌تالًًَ ماوه‌ له‌ زانكۆو په‌یمانگاكان، وتیشی: خوێندكاران ده‌توانن له‌ سه‌عات 5ی ئێواره‌ی ئه‌مڕۆوه‌ له‌رێگه‌ی سایتی زانكۆلاینه‌وه‌ ژماره‌ی نهێنی خۆیان داخڵبكه‌ن و ناوه‌كانیان بدۆزنه‌وه‌.

PUKmedia تایبه‌ت