سەرۆك كۆمارو سەرۆكانی نوێنەران و دادوەری لەبارەی خۆپیشاندانەكانەوە كۆدەبنەوە

.

سەرۆك كۆمار پێشوازیكرد لەسەرۆكی ئەنجومەنی نوێنەران و ئەنجومەنی باڵای دادوەری بەمەبەستی تاوتوێكردنی بەگژاچونەوەی گەندەڵی و پێویستی پارێزگاریكردن لە رۆژنامەنوسان

سەرۆك كۆمار د.بەرهەم ساڵح ئێوارەی ئەمڕۆ 6ی تشرینی یەكەمی 2019،  لەبەغدا پێشوازی لە محەمەد حەلبوسی سەرۆكی ئەنجومەنی نوێنەران و فایەق زەیدان سەرۆكی ئەنجومەنی باڵای دادوەری كرد، سەبارەت بەدواین پێشهاتە سیاسی و ئەمنییەكانی عیراق گفتوگۆ كرا.

لە دیدارەكەدا جەختكرایەوە لەپارێزگاری ئاسایشی كۆمەڵایەتی و بەدواداچونی رێوشوێنەكانی لێكۆڵینەوە بۆ دۆزینەوەی ئەو كەسانەی دەستیان لە توندوتیژییەكاندا هەبووە بەرامبەر بەخۆپیشاندەران و هیزە ئەمنییەكان، هەروەها دووپاتیش لەگرنگی پاراستنی سەروەری یاساو پارێزگاری لەگیانی هاووڵاتیان و دامەزراوە تایبەت و گشتییەكان كرایەوە.

هەر لە دیدارەكەدا گفتوگۆكرا لەسەر دۆسیەی بەگژاچونەوەی گەندەڵی و پێویستی پەلەكردن لەگرتنەبەری رێوشوێنی پێویست بۆ بەهێزكردنی دادوەری لەبەگژاچونەوەی گەندەڵی و لێپێچینەوە لەو تۆمەتبارانەی كە توندوتیژییان ئەنجام داوە.

هەروەها تەئكیدكرایەوە لەسەر پێویستی كردنەوەی دۆسێی لێكۆڵینەوە لەو دەستدرێژیانەی كە لەلایەن كەسانی نەناسراوەوە كرایە سەر بەشێك لەمیدیاو رۆژنامەنوسان، هاوكات دووپاتكرایەوە لەپارێزگاریكردن لەدەزگاكانی راگەیاندن و ئازادی رادەربڕین كە لە دەستووردا پارێزراوە.

PUKmedia راگەیاندنی سەرۆك كۆمار