ئەنجامی وەرگرتنی دەرچووانی ئامادەیی لەزانكۆو پەیمانگاكان رادەگەیەنرێت

.

وەزیری خوێندنی باڵاو توێژینەوەی زانستی رایگەیاند: بەپەسەندكردنی رێنماییەكانی ماستەرو دكتۆرا لەمەودوا لەڕێگەی پلانەكانی خوێندنەوە دەرفەتی زیاتری خوێندنی باڵا بۆ دەرچوانی زانكۆكانمان لە ناوخۆی هەرێمی كوردستان دەڕەخسێنین، بۆ ئەوەی دەرچوانیش بتوانن كاتەكانتان بۆ گەشەپێدانی توانای زانستی و ئەكادیمییەكانیان لەناوخۆی هەرێم بەكاربهێنن.

ئێوارەی ئەمڕۆ 6ی تشرینی یەكەمی 2019، ئەنجومەنی وەزارەت بەسەرۆكایەتی د. ئارام محەمەد قادر سەرۆكی ئەنجومەن و ئامادەبونی سەرۆك زانكۆ حكومییەكان كۆبونەوەی تەواوكاری ژمارە (5) ساڵی 2019ی  لەشاری سلێمانی ئەنجامداو چەند تەوەرو بابەتێكی پەیوەست بەپێشخستنی رەوشی خوێندنی باڵای كوردستان بڕیاریان لێوەدرا. لە گرنگترین بڕیارەكانی ئەنجومەنی وەزارەت:

 كۆنوسی ليژنەی سێنتەرەكانی زمان پەسەندكرا

سەبارەت بە پەسەندكردنی كۆنوسی لێژنەی سەرپەرشتیكردنی سێنتەرەكانی زمان بەمەبەستی پێداچونەوە بە مەرج و ڕێنماییەكانی زمانی ئینگلیزی لە كاروباری زانستی و خوێندنی باڵاو سەرپەرشتی كردنی كاروباری سێنتەرەكان، ئاماژە بۆ ئەوە كرا كۆنوسەكان لەبەرژەوەندی خوێندكاران و هەمو ئەو كاندیدانەیە كە سەرقاڵی ئەم پرۆسەیەن، بۆ ئەمەش د. محمد حوسێن سەرۆكی لیژنەی پێداچونەوە بەڕێنمایەكانی زمانی ئینگلیزی ئاماژەی پرۆگرامەكانی خوێندن و تاقیكردنەوەی دیاریكردنی ئاست و خولی ڕاهێنان و ئەنجامدانی تاقیكردنەوەی كۆتایی و هەڵسەنگاندنی كۆتایی خولەكان و تاقیكردنەوەی كۆتایی و دانانی پرسیار و لێژنەی تاقیكردنەوەكان و لیژنەی راستاندن و گازاندەو كاتی ئەنجامدانی تاقیكردنەوەكانی كۆتایی كردو بۆ ئەندامانی ئەنجومەنی وەزارەتی خستەڕو.

رێنماییەكانی كردنەوەی خوێندنی ماستەرو دكتۆرا پەسەندكرا

لەبارەی كردنەوەی خوێندنی باڵا/ ماستەرو دكتۆرا لەزانكۆكانی هەرێمی كوردستان، دوای راگۆڕینەوەی ئەندامانی ئەنجومەنی وەزارەت و گفتوگۆكردن لەسەر یەكە بە یەكەی بڕگەو مادەكانی پەیوەست بەپوختەی رێنماییەكانی ماستەرو دكتۆرا لەوانە (مەرجی تێكرای نمرە (معدل)، مەرجی توانستی زمانی ئینگلیزی، مەرجی تاقیكردنەوەی توانستی زانستی، مەرجی تەمەن، مەرج و پێداویستی كردنەوەی ماستەر و دكتۆرا لە زانكۆكان، پێشكەشكاری دەرەوەی شارەكانی هەرێمی كوردستان و دەرەوەی عیراق، پێداویستیە زانستیەكانی خوێندن، پلان و ژمارەی كورسیەكان ... هتد ) تاوتوێكران، دواتریش ئەنجومەنی وەزارەتی خوێندنی باڵا و توێژینەوەی زانستی ڕێنماییەكانی ماستەرو دكتۆرای پەسەندكرد.

بۆ پەسەندكردنی رێنماییەكانیش د. ئارام محەمد قادر وەزیری خوێندنی باڵا و توێژینەوەی زانستی ڕایگەیاند: لەمەودواو لەڕێگەی پلانەكانی خوێندنی ماستەر و دكتۆراوە دەتوانین دەرفەتی زیاتری خوێندنی باڵا بۆ دەرچوانی زانكۆكانمان لەناوخۆی هەرێمی كوردستان دەڕەخسێنین بۆ ئەوەی بتوانن كاتەكانتان بەكار بهێنن بۆ گەشەپێدانی توانای زانستی و ئەكادیمییان.

وابڕیارە لەداهاتویەكی نزیكداو دوای پوختكردنی رێنماییەكان بەو گۆڕانكارییانەی لە كۆبونەوەكەدا بڕیاری لێدرا، رێنماییەكان بڵاودەكرێتەوە بۆ ئەوەی خوازیاران بتوانن ئاشنای تەواوی رێنماییەكان بن و خۆیان بۆ خوێندنی ماستەرو دكتۆرا ئامادەبكەن.

ئەنجامی وەرگرتنی خوێندكارانی دوانزەی ئامادەیی پەسەندكرا

لە بەشێكی دیكەی كۆبونەوەكەدا ئەنجامی وەرگرتنی خوێندكاران/ قوتابیانی قۆناغی دوانزەی ئامادەیی لە زانكۆ و پەیمانگەكانی هەرێمی كوردستان بۆ ساڵی نوێی خوێندنی (٢٠١٩-٢٠٢٠) پەسەندكرا. واش بڕیارە  لەداهاتویەكی نزیكدا ئەنجامی وەرگرتن رابگەیەنرێت.

لە بەشێكی دیكەی كۆبونەوەكەدا چەند بابەت و تەوەرێكی دیكەی پەیوەست بە بواری زانستی و خوێندكاران و كارگێڕی پەیوەست بە زانكۆكان و دامەزراوە زانستیەكانی هەرێمی كوردستان و داواكاری و پێشنیازی مامۆستاو فەرمانبەر و هاووڵاتیان گفتوگۆی لەبارەوە كراو بەپێی پەیوەندی و لە چوارچێوەی یاساو رێنماییە كارپێكراوەكان بڕیاریان لێدرا.

PUKmedia راگەیاندنی خوێندنی باڵا