لەهەولێر كوڕێك باوكی خۆی دەكوژێت

.

لەهەولێر كوڕێك باوكی خۆی كوشت، پۆلیسیش دەڵێت رووداوەكە بەهۆی كێشەی خێزانییەوە بووەو كوژراوەكەش كەمئەندامی سەنگەر.

لەوبارەیەوە رائید هۆگر عەزیز وتەبێژی بەڕێوەبەرایەتی پۆلیسی هەولێر بە PUKmediaی رایگەیاند:نیوەڕۆی ئەمڕۆ 6ی تشرینی یەكەمی 2019، بنكەی پۆلیسی ك ە سەر بەڕێوەبەرایەتی پۆلیسی قەزای دەشتی هەولێرە ئاگادار كراونەتەوە لە رووداوێكی كوشتن.

وتیشی: دوای لێكۆڵینەوە لە رووداوەكە دەركەوتوە كە كوڕێك بەناوی  (ڕ.ی) لەگەڵ باوكی بەناوی (ی.ع) بەهۆی كێشەی خێزانیەوە توشی شەڕ هاتون و باوكەكە ویستویەتی چەك بەكاربهێنێت، بەڵام كوڕەكەی چەكەكەی لێسەندوەو تەقەی لێكردوەو كوشتویەتی.

وتەبێژی پۆلیسی هەولێر راشیگەیاند: بكوژەكە لەدایكبوونی ساڵی 1992ە كوژراوەكەش لەدایكبوی ساڵی 1973ەو كەمئەندامی سەنگەرە، بەڵام باری دەرونی ناجێگر بووەو لەپزیشكی هەولێریش ناسنامەی نەخۆشی دەرونی هەیە.

رائید هۆگر دەشڵێت: كاتێك بكوژەكە گەڕاوەتەوە بینویەتی باوكی بەچەك لە دایكی دەدات، بۆیە كێشەكە رویداوەو كاتێك هەوڵی وەرگرتنی چەكەكەی داوە لەباوكی، گوللەیەك دەرچووەو بەر باوكی كەوتووەو كوشتویەتی و لێكۆڵینەوەش لە رووداوەكە بەردەوامە. 

رووداوەكەی ئەمڕۆ لەكاتێكدای دوو رۆژ لەمەوبەر خێزانێكی پێنج كەسی كە ئاوارەی سورین لەگوندی پیرڕەشی هەولێر لەناو ماڵەكەیاندا بەكوژراوی دۆزرانەوە.

PUKmedia تایبەت