یه‌كه‌م رۆژی جه‌ژنی جه‌مایێ به‌ڕێوه‌ده‌چێت

.

ئه‌مڕۆ یه‌كشه‌ممه‌ 6-10-2019 یه‌كه‌م رۆژی جه‌ژنی جه‌مایێ ئێزیدییه‌كان له‌ لالش به‌ڕێوه‌ده‌چێت.

 هه‌موو ساڵێك ئێزیدییه‌كان ئه‌و یاده‌ ده‌كه‌نه‌وه‌و ماوه‌ی حه‌وت رۆژ به‌ چالاكی جیاجیا جه‌ژنه‌كه‌ به‌ڕێوه‌ده‌چێت و بۆ ئه‌مساڵیش چه‌ندین چالاكی دانراوه‌ تا ئه‌نجامبدرێن.

ئه‌وه‌ی جه‌ژنی جه‌مایێ ئه‌مساڵ جیاده‌كاته‌وه‌ له‌ ساڵانی رابردوو ئه‌وه‌یه‌ كه‌ جه‌ژنه‌كه‌ به‌ئاماده‌بوونی سه‌دان هاووڵاتی له‌ده‌ره‌وه‌ی هه‌رێمی كوردستان به‌ڕێوه‌ده‌چێت و به‌شدارن له‌ئاهه‌نگه‌كاندا.

سه‌ره‌تای ده‌ستپێكی جه‌ژنی جه‌ماێی به‌رۆیشت بۆ لالش و بینینی بابا شێخ ئه‌میری ئێزیدییه‌كان ده‌ستپێده‌كات و پاشانیش چالاكییه‌كانی دیكه‌ به‌رده‌وامییان ده‌بێت.

به‌و بۆنه‌یه‌شه‌وه‌ جێگری سه‌رۆك وه‌زیران پیرۆزبایی له‌ ئێزدییه‌كان ده‌كات كه‌ ئه‌مه‌ ده‌قه‌كه‌یه‌تی..

به‌ڕێزان سه‌رجه‌م خوشك و برا ئێزیدییه‌كان
هاتنی جه‌ژنی (جه‌ماێی) له‌هه‌موو خوشك و برا ئێزیدییه‌كان له‌ سه‌رانسه‌ری جیهان پیرۆز ده‌كه‌م و به‌هیوام ئه‌م بۆنه‌یه‌ كه‌ هی كۆبوونه‌وه‌ی ئێزیدییه‌كانه‌ له‌ «لالش» پڕ بێت له‌ خۆشی و شادی و سه‌ره‌تایه‌ك بێت بۆ ساڕێژبوونی برینی ئه‌و مه‌رگه‌سات و كۆمه‌ڵكوژی و خه‌م و ژانانه‌ی له‌ ساڵانی رابردوودا دووچاری كۆمه‌ڵگه‌ ئێزیدییه‌كان بۆوه‌ له‌ شه‌نگال و ده‌وروبه‌ری نه‌ینه‌وا.
حكومه‌تی هه‌رێمی كوردستان پابه‌نده‌ به‌پاڵپشتیكردن و كاركردنی به‌رده‌وام بۆ كه‌مكردنه‌وه‌ی ئازاری ئێزیدییه‌كان له‌ سایه‌ی كوردستانێكی فره‌ ره‌نگ و ته‌بادا كه‌ پێكه‌وه‌ژیانی ئاشتییانه‌و یه‌كتر قبوڵكردن سایه‌و سێبه‌ری بێت.

له‌گه‌ڵ رێزدا

قوباد تاڵه‌بانی جێگری سه‌رۆك وه‌زیران

PUKmedia تایبه‌ت