عه‌بدولمه‌هدی: عیراق بۆ هێرشی وڵاتێك به‌كارناهێنرێت

.

عادل عه‌بدولمه‌هدی سه‌رۆك وه‌زیرانی عیراق له‌تازه‌ترین لێدوانیدا جه‌ختیكردوه‌ته‌وه‌، عیراق نابێته‌ شوێنی هێرشكردنه‌ سه‌ر هیچ وڵاتێك و هه‌مووان به‌یه‌كه‌وه‌ چاره‌سه‌ری كێشه‌كان بكه‌ین به‌شێوه‌ی گفتوگۆو له‌زمانی شه‌ڕ دوربكه‌ونه‌وه‌.

عادل عه‌بدولمه‌هدی سه‌رۆك وه‌زیرانی عیراق وتوویه‌تی:"  عیراق هه‌وڵده‌دات رێگربێت له‌دروستبوونی شه‌ڕ له‌ناو خاكی عیراق و ناوچه‌كه‌و ئه‌مانه‌وێت كێشه‌و قه‌یرانه‌كان به‌شێوه‌یه‌كی باش چاره‌سه‌ر بكه‌ین".

رونیشكردوه‌ته‌وه‌:" مه‌به‌ست له‌چاره‌سه‌ركردنی كێشه‌كان پاراستنی ده‌سه‌ڵاتداریه‌تی و سه‌روه‌ری خاكی عیراقه‌، وه‌ ده‌كۆشین بۆ ئه‌وه‌ی مه‌شخه‌ڵی  قه‌یرانه‌كه‌ خامۆش بكه‌ین".

ئه‌وه‌شی وتووه‌:" په‌یوه‌ندیه‌كی باشمان له‌گه‌ڵ سوریا و وڵاتانی كه‌نداو هه‌یه‌".

عه‌بدولمه‌هدی ئه‌وه‌شی خستووه‌ته‌ڕوو:"  عیراق نابێته‌ هۆكارێك بۆ هێرشكردنه‌ سه‌ر وڵاتانی تر، به‌ڵگه‌ی روونیش له‌به‌رده‌ستدایه‌ كه‌ له‌خاكی عیراقه‌وه‌ هێرش نه‌كراوه‌ته‌ سه‌ر دامه‌زراوه‌ نه‌وتیه‌كانی عه‌ره‌بستانی سعودیه‌".

له‌به‌شێكی تری لێدوانه‌كه‌یدا ووتویه‌تی:" ئه‌گه‌ر عیراق ببێته‌ مه‌یدانی شه‌ڕ ته‌واوی ناوچه‌كه‌  پرچی ئاگری به‌ر ئه‌كه‌وێت، بۆیه‌ ده‌بێت به‌گفتوگۆ كێشه‌كان چاره‌سه‌ر بكرێن".

هاوكات ئه‌وه‌شی وتووه‌:" بڕیاری جه‌نگ بڕیارێكی سه‌خته‌و ده‌رئه‌نجامه‌كانی زۆر دژوارو ئه‌سته‌م ئه‌بێت".

PUKmedia  داڕشتنه‌وه‌ی" سامان یاروه‌یس"