ترامپ: ئاماده‌ی كاردانه‌وه‌ی سه‌ربازین

.

له‌به‌رامبه‌ر هێرشكردنه‌ سه‌ر دامه‌زراوه‌ نه‌وتیه‌كانی عه‌ره‌بستانی سعودیه‌، دۆناڵد ترامپ سه‌رۆك كۆماری ئه‌مریكا، ئاماده‌ی وڵاته‌كه‌ی بۆ كاردانه‌وه‌ی سه‌ربازی له‌كاتی ده‌ركه‌وتنی ئه‌نجامده‌ری راسته‌قینه‌ی كرده‌وه‌كه‌ خسته‌ڕوو.

دۆناڵد ترامپ سه‌رۆك كۆماری ئه‌مریكا، له‌تویتێكیدا رایگه‌یاندوه‌:" وڵاته‌كه‌مان ئاماده‌ی كاردانه‌وه‌ی سه‌ربازیه‌ له‌به‌رامبه‌ر ئه‌وانه‌ی هێرشیان كردوه‌ته‌ سه‌ر دامه‌زراوه‌ نه‌وتیه‌كانی عه‌ره‌بستانی سعودیه‌، به‌وه‌وه‌ به‌ستراوه‌ كه‌ لایه‌نی تاوانبار بناسرێته‌وه‌و له‌ژێر چ پاڵنه‌رێك به‌و كاره‌ هه‌ستاوه‌".

ئاماژه‌ی به‌وه‌شداوه‌:" چه‌ند به‌ڵگه‌یه‌ك هه‌یه‌ واده‌كات كه‌ لایه‌نی هێرشكه‌ر بناسین، له‌كاتی سه‌لماندنی ئه‌و راستیانه‌ ئاماده‌ی هێرشی سه‌ربازی ده‌بین".

له‌تویتێكی تردا سه‌رۆك كۆماری ئه‌مریكا وتوویه‌تی:" ئاماده‌ین تاكو پاشای عه‌ره‌بستانی سعودیه‌ پێمان بڵێت چ لایه‌نێك ئه‌و كاره‌ی كردوه‌، وه‌ له‌ژێر چ پاڵنه‌رێك به‌و كاره‌ هه‌ستاوه‌".

PUKmedia  داڕشتنه‌وه‌" سامان یاروه‌یس"