هیچ حاڵەتێكی تای خوێن بەربوون لە کوردستان تۆمارنەكراوە

.

وه‌زیری كشتوكاڵی حكومه‌تی هه‌رێمی كوردستان دووپاتیده‌كاته‌وه‌ هیچ حاڵه‌تێكی تای خوێنبه‌ربوون له‌هه‌رێمی كوردستان له‌ماوه‌ی ئه‌مساڵدا تۆمار نه‌كراوه‌.

بێگه‌رد تاڵه‌بانی وه‌زیری كشتوكاڵی حكومه‌تی هه‌رێمی كوردستان رایگه‌یاندوه‌:" ئەمڕۆ دەستمان کرد بە جێبەجێکردنی هەڵمەتی شوشتنی ئاژەڵ و رشاندنی شوێنی ئاژەڵەكان دژ بە ڤایرۆسی تای خوێن بەربوون. مایەی خۆشحاڵیە ئەمساڵ هیچ حاڵەتێكی تای خوێن بەربوون لە کوردستانەکەمان تۆمارنەكراوە، بەڵام خۆپارێزی و ڕێگری کردن لە سەرهەڵدانی ئەو نەخۆشیە دەستمان بە هەڵمەتەكە كردووە.

ئاماژه‌ی به‌وه‌شداوه‌:" ئەمڕۆ لە یەکەم وێستگەدا لە گوندی باغەمرەی شەهاب لە دەشتی هەولێر لەگەڵ تیمەکان بووین بۆ دەستپێکردن بەو هەڵمەتە. کە زۆر گرنگ و پێویستە بۆ پاراستنی تەندروستی کوردستانیان و سامانی ئاژەڵ.هەڵمەتەكە لەسەرتاسەری كوردستان دەستی پێكردووە، هەرچەندە ئەمساڵ هیچ حاڵەتێكی ئەو نەخۆشیە لە هەرێمی كوردستان تۆمارنەكراوە، لە ساڵی رابردودا ئەو نەخۆشیە هەبووە و هەندێك حاڵەت تۆماركراون.

باسی له‌وه‌شكردوه‌:" وەزارەتی كشتوكاڵ بڕی 430 ملیۆن دیناری تەرخانكردوە بۆ كڕینی دەرمان و ئەو پێداویستیانەی لەو هەڵمەتەدا بەكاردەهێنرێن.

 جه‌ختیكردوه‌ته‌وه‌:" تای خوێنبەربوون نەخۆشیەكە لە ئاژەڵدا دروست دەبێت و بەهۆی قڕنەیەكەوە دەگوزارێتەوە بۆ مرۆڤ كە نەخۆشییەكی كوشندەیە.

PUKmedia تایبه‌ت