تۆ ئەگەر..

.

تۆ ئەگەر..
وەک چۆن ئینسان بە وەسێتکردن نامرێ، عەینی شت بە پرسیار لەخۆکردنیش هیچی لێ نایە، بەڵکو بە عەکسەوە لەوانەیە مەعلوماتی عامەی زیاد بکات و شعوری کوردایەتیشی بگاتە لای ئیشارەتە سورەکە.
فەلەبەر ئەوە شەوان پێش خەوتن ئەم پرسیارانە لە خۆت بکە:
× تۆ ئەگەر داهاتی نەوت بوویتایە حەزت ئەکرد لەکوێ بیانشاردیتایەتەوە؟
× گریمان ئەوا جەنابت دارۆغای شاریت، قەرارت داوە کوێ ی تر بکەی بە نێرگەلەخانە؟
× خوانەخواستە ئەگەر سۆشیال دیموکرات بوویتایە پێت خۆش بوو قاچاخچی نەوت بی یان هی شیشە؟
× ئەگەر شیعری فارسی بوویتایە هیوادار ئەبوویت کام کەڵەشاعیرەی کورد ناخونەکت لێ بدات؟
× ئەگەر کتێبی پەیڕەو و پرۆگرام بوویتایە حەزت ئەکرد بتکەن بە لوولەی پاقلە یان هی گوڵە بەڕۆژە؟
×ئەگەر هەورە بروسکە بوویتایە یەکەم تەلەفزیۆن کام کەناڵەت ئەسووتاند؟
× تۆ ئەگەر پێوەری ئاو بوویتایە حەزت ئەکرد هاوسەری چ وەزیرێک هاوردەت بکات؟
× تۆ ئەگەر سەیارەی جامڕەش بوویتایە حەزت ئەکرد جاسووست پێ بگوێزرێتەوە یان دەمانچە؟
× عەیب نەبێ ئەگەر پەیوەندی بوویتایە هەوڵت ئەدا پەیوەندی سێکسی بوویتایە یان پەیوەندی سیاسی؟
× بۆ ئەوەی کەس لێت تێ نەگات حەزت ئەکرد دەستوخەتی دکتۆر بوویتایە یان هەڵوێستی ئۆپۆزسیۆن؟