له‌و باوه‌ڕه‌دام

.

له‌و باوه‌ڕه‌دام

× وڵاتێكى سه‌یره‌ به‌ڕاستى، ته‌نانه‌ت له‌ ئوتوخانه‌ش داواى فۆڕمى بایه‌عیت لێ ئه‌كه‌ن.
× ناخۆشترین ئیش: چاوه‌ڕوانى. له‌و ناخۆشتر، نه‌زانى هى چى.
× وه‌زعى ئێستاى هه‌رێم له‌و به‌شه‌ى باخچه‌ى ئاژه‌ڵان ئه‌چێ كه‌ به‌رازه‌كه‌ ئه‌ڵێ ئێمه‌ هه‌موومان یه‌كسانین به‌ڵام به‌عزێكمان یه‌كسانتر.
× خۆزگه‌ ساویلكه‌یى تاوان بوایه‌، ئیعدام ئه‌كرام و رزگارم ئه‌بوو.
× واقم وڕماوه‌، وه‌كو ئه‌و مناڵه‌ى كه‌ قورئانى خه‌تم كردبێ و له‌ نادى ته‌لار حه‌فله‌ى بۆبكه‌ن.
× كه‌سێك كه‌ له‌گه‌ڵ ئه‌قڵى سه‌رده‌مدا نه‌گونجا هه‌قه‌ بیخه‌یته‌ سه‌رده‌م.
× له‌و باوه‌ڕه‌دام به‌عزێكى تریش بێن (تازه‌ترین نامه‌ى عارف روشدى بۆ سه‌روو خۆى).
× ماستاوچێتى ئێستا زۆر زه‌حمه‌ته‌، ستایش و پیاهه‌ڵدان نى یه‌.. قڕوقه‌پكردنه‌.
× له‌م زه‌مانه‌دا دوو شت به‌ئاسانى دێنه‌ خواره‌وه‌، دووهه‌مینیان مه‌عنه‌ویاته‌.
× حه‌زم ئه‌كرد مه‌سئول بومایه‌، بۆئه‌وه‌ى كه‌ له‌ ترافیك لایته‌كاندا مناڵى سواڵكه‌رم بینى به‌خه‌یاڵمدا نه‌یه‌ت.
× په‌ندى پاشینان: تا تۆ نه‌ده‌ى ره‌نج ئه‌وان ناخۆن گه‌نج.
× كۆمپیوته‌رێكى زۆر عه‌جایه‌به‌ ئه‌م بیره‌وه‌رییه‌ى مرۆڤ، ئه‌وى رۆى رۆى به‌ڵام دیلیت نابێ.