خاتوو شاناز كوڕی شەهید ئاسۆ بەسەر دەكاتەوە

.

خاتوو شاناز برایم ئەحمەد لە نەخۆشخانەی شار لە سلێمانی، بڕیاری كوڕی شه‌هیدی فه‌رمانده‌ ئاسۆ و شەهیدێکی زیندوی هێزەكانی دژە تیرۆر بەسەردەکاتەوە، له‌نزیكه‌وه‌ی له‌باری ته‌ندروستیانی پرسی و هیوای زوو چاكبونه‌وه‌ی بۆخواستن.

ئەمڕۆ ۲۳-۸-۲۰۱۹، خاتوو شاناز برایم ئەحمەد به‌یاوه‌ری به‌رێزان د.سەباح هەورامی به‌رێوه‌به‌ری گشتی ته‌ندروستی پارێزگای سلێمانی و دكتۆر محەمەد علی یاریدەرەی به‌رێوه‌به‌ری گشتی ته‌ندروستی سلێمانی پزیشك و كارمەندانی نەخۆشخانەی شار، سه‌ردانی ( بڕیار )ی ته‌مه‌ن 5 ساڵان، كوڕی شه‌هیدی فه‌رمانده‌ ئاسۆی مام جه‌لال مه‌سوی لێپرسراوی به‌شی ئۆپراسیۆنی گه‌رمیانی کرد، له‌نزیكه‌وه‌ی له‌باری ته‌ندروستی پرسی و هیوای زووچاكبونه‌وه‌ی بۆخواست، هاوکات ئامادەی خۆی دەربڕی بۆئەوەی هەرچی پێویست بێت بۆ رزگارکردنی ژیانی بکرێت.

پاشان، لە میانەی سەردانیكردنی بۆ نەخۆشخانەی شار شەهیدێکی زیندوی هێزەكانی دژە تیرۆری بەناوی ( رێکەوت محەمەد هەیاس ) بەسەركردەوە كە لە یەکێک لەشەڕەکانی بەرگریکردن لەخاکی پیرۆزی کوردستان دژ بەتاریک پەرستانی داعش بەسەختی بریندار بوو، له‌باری ته‌ندروستیانی پرسی و هیوای زوو چاکبوونەوە و سەلامەتی بۆ خواستن و دڵسۆزی و ماندووبونی هێزەکانی دژە تیرۆری بەرزنرخاند،‌ دووپاتیشیکردەوە هەموو ئەو دەستکەوتانەی ئەمڕۆ بەخوێن و قوربانیدانی هەزاران پێشمەرگە و هێزەکانی دژە تیرۆر و هێزە ئەمنییەکانی دیکەی کوردستان بەدەست هاتوە و پارێزراوە.

هه‌ر له‌و سه‌ردانه‌یدا، خاتوو شاناز، سوپاسی بەرێوەبەری گشتی تەندروستی سلێمانی و پزیشكان و كارمه‌ندانی نه‌خۆشخانه‌ی شاری كرد له‌به‌رامبه‌ر ئه‌و خزمه‌تگوزاریه‌ پزیشكیانه‌ی پێشكه‌ش به‌نه‌خۆش و برینداران ده‌یکەن.

PUKmedia تایبەت