تەئكید لەچڕكردنەوەی هەوڵەكان بۆ بەستنی كۆنگرە دەكرێتەوە

.

ئەمڕۆ دوو شەممە 19ی ئابی 2019، وەفدێكی باڵای ئەنجومەنی ناوەندی كە پێكهاتبوون لە سكرتارییەت و ژمارەیەك لە ئەندامانی ئەنجومەنی ناوەندی بەمەبەستی پیرۆزبایی و دوپاكردنەوەی پشتیوانی سەردانی رزگار عەلی ئەندامی مەكتەبی سیاسی و لێپرسراوی نوێی دەزگای هەڵبژاردنیان كرد.

سەرەتا زوبێر عوسمان جێگری سكرتێری ئەنجومەنی ناوەندی بەناوی ئەنجومەنی ناوەندییەوە پیرۆزبایی لە رزگار عەلی كردو پشتیوانی و هەماهەنگی ئەنجومەنی ناوەندی بۆ دەزگای هەڵبژاردن دووپاتكردەوە.

لەبەرامبەردا رزگار عەلی خۆشحاڵی خۆی بۆ سەردان و پشتیوانی ئەنجومەنی ناوەندی دەربڕی و وتی: ئەنجومەنی ناوەندی ئۆرگانێكی گرنگی یەكێتیەو بەرنامەی تایبەتمان دەبێت بۆ هەماهەنگی زیاتری نێوانمان بەتایبەتی لە هەڵبژاردنەكانی داهاتودا كە زۆر گرنگ و چارەنوسسازن بۆ گەلەمان و یەكێتیی نیشتیمانیی كوردستان.

لەبەشێكی تری دیدارەكەدا ئەندامانی ئەنجومەنی ناوەندی و رزگار عەلی وێرای گفتوگۆكردن لەسەر بارودۆخی سیاسی كوردستان و دۆخی ناوخۆی یەكێتیی، جەختیان لەسەر چڕكردنەوەی هەوڵەكان كرد بۆ بەستنی كۆنگرە كە گیانی هەڤاڵانە و پەیڕەوی ناوخۆ بكرێتە بنەمای كاركردنی هەنگاوەكانی بەستنی كۆنگرەی چوارەمی یەكێتیی نیشتمانیی كوردستان.

PUKmedia راگەیاندنی ئەنجومەنی ناوەندی