عادل عه‌بدولمه‌هدی: مووچه‌ی خه‌ڵكی هه‌رێمی كوردستان نابڕین

.

عادل عه‌بدولمه‌هدی راگه‌یاند، شه‌ڕی دژی داعش دوورودرێژ ده‌بێت و به‌له‌به‌رچاوگرتنی بارودۆخی عیراق مامه‌ڵه‌ی دروست ده‌كه‌ین.

ئه‌و وتانه‌ی عادل عه‌بدولمه‌هدی سه‌رۆك وه‌زیرانی عیراق له‌میانه‌ی چاوپێكه‌وتنێكی ته‌له‌فزیۆنیدا هات له‌گه‌ڵ په‌یامنێرانی چه‌ند كه‌ناڵێكی راگه‌یاندنی عه‌ره‌بی و بیانی وتیشی: نزیكه‌ی 30 هه‌زار ئاواره‌ی عیراق له‌كه‌مپی هۆڵن له‌سوریاو پلانمان هه‌یه‌ بۆ گه‌ڕانه‌وه‌یان.

وتیشی: به‌شی زۆری ئاواره‌كانمان خه‌ڵكی پارێزگای نه‌ینه‌وان و له‌و ژماره‌ ئاواره‌یه‌ش به‌شی زۆری له‌هه‌رێمی كوردستانن و به‌ڕێزه‌وه‌ مامه‌ڵه‌یان له‌گه‌ڵ ده‌كرێت و هاوكارییان پێشكه‌ش ده‌كرێت.

له‌باره‌ی په‌یوه‌ندییه‌كانی نێوان و هه‌رێم و به‌غدا رایگه‌یاند: بۆ ئێمه‌، كورد و عه‌ره‌ب و ره‌گه‌زه‌كانی دیكه‌ی عیراق جیاوازی نیه‌و هه‌موومان هاووڵاتی عیراقین و پابه‌ندده‌بین له‌سه‌ر ئه‌و رێككه‌وتنه‌ی كه‌له‌نێوان هه‌ردوولادا هه‌یه‌و قوتی خه‌ڵكی كوردستان تێكه‌ڵی بابه‌تی سیاسی ناكه‌ین و له‌سه‌ر شانمان پێویسته‌ به‌پێی ده‌ستووری عیراق مامه‌ڵه‌ له‌گه‌ڵ هه‌رێمی كوردستان و هه‌موو هاووڵاتییه‌كی عیراق بكه‌ین بێ جیاوازی، له‌به‌رامبه‌ریشدا پێویسته‌ حكومه‌تی هه‌رێمی كوردستان پابه‌ندی رێككه‌وتنه‌كه‌مان بێت و ئاماده‌بێت رۆژانه‌ 250 هه‌زار به‌رمیل نه‌وت راده‌ستی كۆمپانیای سۆمۆ بكات، تا هه‌نگاوی نوێ بۆ به‌ره‌وپێشبردنی رێككه‌وتنه‌كه‌مان بنێین.

PUKmedia ئاژانسه‌كان