واده‌ی سه‌ردانیكردنی راگیراوانی هه‌ولێر له‌جه‌ژندا راگه‌یه‌نرا

.

به‌ڕێوه‌به‌ری پۆلیسی گرتن و گواستنه‌وه‌ی هه‌ولێر ڕایده‌گه‌یه‌نێت، له‌ رۆژی دووه‌م و سێیه‌می جه‌ژنی قورباندا، كه‌سوكاری ڕاگیراوان ده‌توانن سه‌ردانی به‌شی پۆلیسی گرتن و گواستنه‌وه‌ بكه‌ن، به‌ڵام رۆژی یه‌كه‌م رێگاپێدراو نییه‌.

موقه‌ده‌می مافپه‌روه‌ر، خه‌سرۆ غازی خۆشناو، به‌ڕێوه‌به‌ری پۆلیسی گرتن و گواستنه‌وه‌ی هه‌ولێر، به‌ میدیاكانی راگه‌یاند، رۆژی یه‌كه‌می جه‌ژنی قوربان، كه‌ ده‌كاته‌ یه‌كشه‌ممه‌ی داهاتوو (11-8-2019)، سه‌ردانیكردنی ڕاگیراوان رێگاپێدراو نییه‌، به‌ڵام رۆژی دووه‌م و سێیه‌م كه‌سوكاری ڕاگیراوان ده‌توانن سه‌ردانیان بكه‌ن.

به‌ وته‌ی موقه‌ده‌م خه‌سرۆ، رۆژی دووه‌می جه‌ژن (12-8-2019) تایبه‌ته‌ به‌ ژنان و هه‌روه‌ها رۆژی سێیه‌میش (13-8-2019) پیاوان ده‌توانن سه‌ردانی ڕاگیراوان بكه‌ن، گوتیشی كه‌ ئاماده‌كارییان بۆ پێشوازیكردن له‌ سه‌ردانیكاران كردووه‌ و هیواشی خواست كه‌سوكاری راگیراوان له‌ كاتی سه‌ردانیكردندا ره‌چاوی رێنماییه‌كانی پۆلیس بكه‌ن.

به‌ڕێوه‌به‌ری پۆلیسی گرتن و گواستنه‌وه‌ی هه‌ولێر راشیگه‌یاند، كاتی سه‌ردانیكرن له‌ هه‌ردوو رۆژی دووه‌م و سێیه‌می جه‌ژندا، له‌ كاتژمێر 8ـی به‌یانییه‌وه‌ بۆ كاتژمێر 12ـی نیوه‌ڕۆیه‌ و دوای جه‌ژنیش سیستمه‌كه‌ وه‌ك پێشووی لێدێته‌وه‌.

PUKmedia ڕاگه‌یاندنی پۆلیسی هه‌ولێر