مەلا بەختیار: خوێنی شەهیدەكانمان سەربەرزی كردووین

.

مەلا بەختیار، رایدەگەیەنێت: بەداخەوە هێشتا بەو هەموو تاوانەوە كە ئەنجامیانداوە، داعش‌و ئەندێشەی داعش بەتەواوی ناناسین! 

لێپرسراوی دەستە كارگێڕی، لەچوارچێوەی ئێوارەی (7/8/2019) لەشۆڕش، خێزان‌و منداڵەكانی شەهید پشتیوانی بەسەر كردەوە، كە بەتیغی داعش لەموسڵ شەهید كراو پاشان سەردانی دایك‌و باوكی شەهیدیشی كردو، رووداوی شەهیدكردنەكەی شەهید پشتیوانیشی، لەگەڵ كۆی ئەو تاوانانەی داعش ئەنجامیدان، بەكارەساتێكی جەرگبڕ پێناسەكرد‌و دوو كوڕەكەشی بەجوانترین دوو یادگاری شەهید پشتیوان بۆ خێزانەكەیان ‌و میللەتەكەشمان ناوبرد، كە وەجاغی شەهید رۆشن دەكەنەوە.

مەلا بەختیار، بۆ دایك باوكی شەهید پشتیوانیش، ئاماژەی بۆ ئەوەكرد، كە: نەك بۆ دایك‌و باوكی، یان خێزان‌و دوو جگەر گۆشەكەی، بەڵكو بۆ هەموو میللەتەكەمان، مایەی سەربەرزیی‌و شانازیشە كە رۆڵەیەك‌و گەنجێكی جوانی وەك شەهید پشتیوان، دەبێتە قوربانی بەرگری لەخەڵك‌و خاكی كوردستان‌و رایگەیاند:

ئەوە خوێنی شەهیدەكانمانە كە وایكردووە هەموومان لەكوردستاندا بە سەربەرزی یەكتر ببینین‌و وتیشی: راستە شەهیدبوون ئازارێكی گەورەیە، بەڵام سەربەزییەكە شانازیی‌و سوكنایی‌و ئارامییەكە بۆ هەمووان.

لەلایەن خۆشییانەوە، خێزان‌و بنەماڵەی شەهید پشتیوان، پاشئەوەی سوپاسی بەسەركردنەوەی مەلا بەختیاریان كردو ئاماژەیان بۆ ئەوەكرد، كە شەهید پشتیوان مایەی شانازیی بنەماڵەكەیانە، كە لەپێناو ئازادی میللەتەكەمان‌و كوردستاندا  خوێنی خۆی بەخشیوە

PUKmedia   تایبەت