ئه‌مریكا پاڵپشتی هه‌نگاوه‌كانی چاكسازی له‌هه‌رێم ده‌كات

.

ئه‌مڕۆ 8-8-2019 له‌دیوانی وه‌زاره‌ت د. دارا ڕه‌شید وه‌زیری پلاندانان پێشوازی كرد له‌ خاتوو ئێلیزابێس ڕه‌وزنستۆك – سیله‌ر كونسوڵی گشتی ئه‌مریكا به‌وه‌كاله‌ت له‌هه‌رێمی كوردستان.

له‌دیداریك باس له‌ په‌یوه‌ندیه‌كانی نێوان هه‌رێمی كوردستان و ئه‌مریكا كرا هاوكات هه‌ردوولا هاورابون له‌سه‌ر پته‌وكردنی په‌یوه‌ندیه‌كان و به‌رده‌وامیدان به‌هاوكارییه‌كانی ولایه‌ته‌ یه‌كگرتووه‌كانی ئه‌مریكا بۆ هه‌رێمی كوردستان" ته‌وه‌رێكی تری دیداره‌كه‌ ته‌رخانكرا بۆ گفتوگۆكردن له‌باره‌ی په‌یوه‌ندیه‌كانی نێوان هه‌رێمی كوردستان و عیراق له‌و باره‌یه‌وه‌ كونسوڵی گشتی ئه‌مریكا به‌وه‌كاله‌ت له‌هه‌رێمی كوردستان ڕای گه‌یاند ئه‌مریكا پاڵپشتی هه‌ر ده‌ست پێشخه‌ری و نزیك بونه‌وه‌یه‌كی نێوان هه‌ولێر و به‌غدا ده‌كات و هه‌روه‌ها خۆشحاڵی وڵاته‌كه‌شی نیشاندا بۆ ئه‌و نزیك بونه‌وه‌و ده‌ستپێكردنه‌وه‌ی كۆبونه‌وه‌كانی نیوان هه‌رێم و به‌غدا.

دواتر د. دارا ڕه‌شید باسی له‌هه‌وڵه‌كانی وه‌زاره‌تی پلاندانان كرد له‌ڕێگه‌ی دارشتن و ئاماده‌كردنی پلان و به‌رنامه‌ی چوارساڵی داهاتووی حكومه‌تی هه‌رێم.

 له‌به‌شێكی تری دیداره‌كه‌ تاوتوێی كارنامه‌ی حكومه‌تی هه‌رێم كرا به‌تایبه‌ت هه‌نگاونان بۆ بن بڕكردن و نه‌هێشتنی گه‌نده‌ڵی و ئه‌نجامدانی چاكسازی له‌سێكته‌ره‌ جیاجیاكان له‌رێگه‌ی به‌ئه‌لیكتڕۆنی كردنی دامه‌زاروه‌كانی حكومه‌ت" بۆئه‌مه‌ش وه‌فدی میوان ئاماده‌ی ته‌واویان نیشاندا بۆ پاڵپشتی كردن و هاوكاری كردنی حكومه‌تی هه‌رێمی كوردستان بۆ ئه‌وه‌ی بتوانێت زاڵ بێت به‌سه‌ر ئه‌و ته‌گه‌ر و پێشهاتانه‌ی دێنه‌ پێشی.

پاشان د. دارا ڕه‌شید وه‌زیری پلاندانان ستایشی هه‌وڵه‌ به‌رده‌وامه‌كانی ئه‌مریكای كرد بۆ هه‌رێمی كوردستان به‌تایبه‌ت له‌ شه‌ری دژی داعش و یارمه‌تیه‌ مرۆییه‌كان بۆ دانیشتوانی هه‌رێم به‌تایبه‌ت ئه‌و ئاواره‌ و په‌نابه‌رانه‌ی به‌هۆی شه‌ڕی تیرۆره‌وه‌ ڕوویان له‌هه‌رێمی كوردستان كرد" هه‌روه‌ك داواشی كرد ئه‌مریكا چۆن رۆڵ و پاڵپشتی گرنگی هه‌رێمی كوردستان بوه‌ ئاواش به‌رده‌وامبێـت به‌تایبه‌ت له‌ سێكته‌ره‌كانی ئابوری و هاندانی كۆمپانیاكانی ولاته‌كه‌ی له‌ڕێگه‌ی ئه‌نجامدانی كاری وه‌به‌رهێنان.

PUKmedia ڕاگه‌یاندنی وه‌زاره‌تی پلاندانان