قه‌ره‌ته‌په‌.. بۆشایی ئه‌منی هه‌ڕه‌شه‌ له‌ناوچه‌كه‌ ده‌كات

.

به‌هۆی نه‌بوونی هێزی پێویست و كه‌مته‌رخه‌می هێزه‌ عیراقیه‌كان له‌ناوچه‌كه‌دا، مه‌ترسی گه‌وره‌ی ئه‌منی له‌سنوری قه‌ره‌ته‌په‌ – جه‌له‌ولا، دروست بووه‌و داعش خۆی رێكده‌خاته‌وه‌.

محه‌مه‌د نارێنی لێپرسراوی كۆمیته‌ی قه‌ره‌ته‌په‌ی یه‌كێتیی نیشتمانی كوردستان به‌ PUKmedia ی راگه‌یاند: له‌سنوری نێوان قه‌ره‌ته‌په‌ – جه‌له‌ولا، كه‌ به‌درێژی 37 كیلۆمه‌ترو قوڵای 15 كیلۆمه‌تره‌و رووباری حه‌مرین ده‌كه‌وێته‌ دامێنیانه‌وه‌ هیچ هێزێكی ئه‌منی نیه‌، كه‌پێشتر دوو لیوای پێشمه‌رگه‌ له‌وێ بووه‌و به‌هیچ شێوه‌یه‌ك رێگه‌ی جوڵه‌كردن به‌داعش نه‌درابوو.

وتیشی: ئه‌وه‌ش وایكردوه‌ داعش له‌و سنوره‌ به‌تایبه‌ت له‌ناو دارو زه‌لكاوه‌كاندا خۆی رێكبخاته‌وه‌و ببێته‌ مه‌ترسیه‌كی گه‌وره‌ بۆ ژیانی هاووڵاتیان، كه‌ چه‌ند رۆژێك پێش ئێستا دوو كه‌سیان رفاندبوو.

باسی له‌وه‌شكرد:  هێزه‌ عیراقیه‌كان بێ به‌رنامه‌و پێویست نین، بوونی پێشمه‌رگه‌و گه‌ڕانه‌وه‌ی پێشمه‌رگه‌ نه‌بێت هیچ شتێك چاره‌سه‌ری ئه‌و دۆخه‌ مه‌ترسیداره‌ ناكات، كه‌ رۆژ به‌رۆژ مه‌ترسی زیاتر دروست ده‌كه‌ن.

محه‌مه‌د نارێنی ووتی: هاووڵاتیانی ناوچه‌كه‌ش پێشمه‌رگه‌یان ده‌وێت و به‌باشی ده‌زانن كه‌ ژیانیان به‌ره‌و مه‌ترسیه‌كی گه‌وره‌ ده‌چێت. 

PUKmedia سامان یاروه‌یس