كۆسره‌ت ره‌سول عه‌لی له‌ هولێر پێشوازی له‌كونسوڵی ئیتاڵیا كرد و رایگه‌یاند، كه‌ پێویسته‌ هاوكاری و هه‌ماهه‌نگی زیاتر هه‌بێ له‌نێوان هه‌رێمی كوردستان و حكومه‌تی ئیتاڵیا.

‎كۆسره‌ت ره‌سول عه‌لی رایگه‌یاند: كه‌ یه‌كێتی پشتیوانی له‌ گفتوگۆكانی نێوان هه‌رێم و به‌غدا ده‌كا و تیمی حكومه‌تیشی راسپاردووه‌ به‌وپه‌ڕی دڵسۆزییه‌وه‌ خزمه‌ت بكه‌ن و پێشڕه‌و بن له‌ جێبه‌جێكردنی به‌ڵێنه‌كانی بانگه‌شه‌ی هه‌ڵبژاردن و چاكسازی له‌ دامه‌زراوه‌كانی حكومه‌ت.

ئه‌م وتانه‌ی جێگری سكرتێری گشتی یه‌كێتیی نیشتمانیی كوردستان سه‌رله‌به‌یانی ئه‌مڕۆ چوارشه‌ممه‌ 31-7-2019، له‌میانی پێشوازیكردنی له‌ سیرینا مورۆنی كونسوڵی گشتی ئیتاڵیا له‌ هه‌رێمی كوردستان و وه‌فدی هاوڕێی هات.

 له‌ دیداره‌كه‌دا هه‌ردوولا گفتوگۆیان كرد، له‌باره‌ی په‌یوه‌ندییه‌كانی نێوان هه‌رێمی كوردستان و ئیتاڵیا و ڕۆڵی ئیتاڵیا له‌ هاوكاری كردنی هه‌رێمی كوردستان، كۆسره‌ت ره‌سوڵ سوپاسی حكومه‌ت و گه‌لی ئیتاڵیای كرد و دووپاتی كرده‌وه‌ كه‌ پێویسته‌ هاوكاری و هه‌ماهه‌نگی زیاتر هه‌بێ له‌نێوان هه‌رێمی كوردستان و ئیتاڵیا.

په‌یوه‌ندییه‌كانی نێوان هه‌رێم و به‌غدا و گفتوگۆكان به‌ ئاراسته‌ی چاره‌سه‌ری كێشه‌كان ته‌وه‌رێكی تری دیداره‌كه‌ بوو، جێگری سكرتێری گشتی و كونسوڵی ئیتاڵیا به‌وردی گفتوگۆی هه‌نگاوه‌كانی لێكنزیكبوونه‌وه‌ و تێگه‌یشتنی هاوبه‌شی نێوان هه‌رێم و به‌غدایان كردو دووپاتیان كرده‌وه‌ كه‌پێویسته‌ هه‌ردوولا به‌نیه‌تێكی جدی هه‌نگاو بنێن بۆ چاره‌سه‌ری بنه‌ڕه‌تی كێشه‌كان.

كابینه‌ی نوێی حكومه‌تی هه‌رێمی كوردستان و به‌شداری یه‌كێتی له‌ كابینه‌كه‌ ته‌وه‌رێكی تری دیداره‌كه‌ بوو، كۆسره‌ت ره‌سوڵ عه‌لی به‌وردی باسی له‌پلان و به‌رنامه‌ی یه‌كێتی بۆ حوكمڕانی كردو رایگه‌یاند، تیمی یه‌كێتی ئه‌ركێكی قورسیان له‌سه‌ر شانه‌ و ده‌بێ پێشه‌نگ بن له‌ خزمه‌تكردن و چاكسازی و جێبجێكردنی باشترین به‌رنامه‌ی خزمه‌تگوزاری.

‎كۆتا ته‌وه‌ری دیداره‌كه‌ گفتوگۆكردن بوو له‌باره‌ی جه‌نگی به‌ره‌نگاربوونه‌وه‌ی تیرۆر و هه‌نگاوه‌كانی به‌یه‌كجاری بنبڕكردن و له‌ناوبردنی بیری تیرۆر و توندڕه‌وی، جێگری سكرتێری گشتی سوپاسی هێزه‌كانی هاوپه‌یمانانی كرد كه‌ پشتیوان و پاڵپشت بوون له‌ هاوكاری پێشمه‌رگه‌و سوپای عیراق بۆ له‌ناوبردنی تیرۆرستان و داواشی كرد هه‌وڵی جدی بدرێت بۆ له‌ناوبردنی بیری توندڕه‌وی له‌ناوچه‌كه‌.

PUKmedia تایبه‌ت