یەكێتی كاتی كۆنگرەی راگەیاند

.

كۆبوونەوەی مەكتەبی سیاسی یەكێتی كۆتاییهات و وتەبێژیش رایگەیاند: لەكۆبووەوەكەدا تاوتووێی بارودۆخی هەرێم و عیراق كراوە، راشیگەیاند:دەبێت  تا كۆتایی ئەمساڵ یەكێتی كۆنگرەی بەستبێت و كۆنگرەیەكی یەكێیانەش دەبێت.

لەتیف شێخ عومەر وتەبێَژی رەسمی یەكێتیی نیشتمانیی كوردستان دوای كۆتاییهاتنی كۆبوونەوەی مەكتەبی سیاسی لەلێدوانێكی رۆژنامەوانیدا رایگەیاند: لەكۆبوونەوەی ئەمڕۆی مەكتەبی سیاسیدا تاووتوێی بارودۆخی هەرێم و عیراق كراوە.

لەبارەی كۆنگرەی یەكێتیشەوە، رایگەیاند: مەكتەبی سیاسی تەئكیدی لەسەر بەستنی كۆنگرە كردەوەو دەبێت تا پێش كۆتایی ئەمساڵ 2019، كۆنگرەی یەكێتی بەسترابێت و كۆنگرەكەش كۆنگرەیەكی یەكێتیانە دەبێت.

ئەوەشی خستەڕوو كە رۆژی بەستنی كۆنگرە دیارینەكراوە، بەڵام قسە لەسەر ئەوەكراوە كە پێش كۆتایی ئەمساڵ كۆنگرە تەواو كرابێت.

وتیشی: ئامانج لەبەستنی كۆنگرە دوو ئەركە، یەكێكیان پێداچوونەوەی سیاسیەكان و داڕشتنی سیاسیەت و پەیڕەو پرۆگرامێكی نوێ و هەڵبژاردنی سەركردایەتییە.

لەبارەی ئاساییكردنەوەی دۆخی كەركوك و هەڵبژاردنی پارێزگاریشەوە، وتەبێژی یەكێتی رایگەیاند: لەكۆبوونەوەكەدا ئەوەی پەیوەندی بەكەركوكەوە هەبوو قسەی لەسەر كراو بڕیاری لێدرا.

ئەوەشی رونكردەوە كە یەكێتی دەخوازێت حكومەتی هەرێم پەیوەندییەكی دروستی لەگەڵ حكومەتی ناوەند هەبێت و ئەوەی پێویست بێت یەكێتی بۆ پتەوكردنی ئەو پەیوەندییە دەیكات. 

PUKmedia تایبەت