وەفدێكی باڵای حكومەتی هەرێم بەسەرۆكایەتی مەسرور بارزانی سەرۆكی حكومەت و قوباد تاڵەبانی جێگری سەرۆكی حكومەت بە یاوەری چەند وەزیرێك بۆ تاووتوێكردنی چەند پرسێك سەردانی بەغدا دەكات.

سەمیر هەورامی بەڕێوەبەری نوسینگەی رۆژنامەوانی قوباد تاڵەبانی بە PUKmedia ی راگەیاند: وەفدێكی باڵای حكومەتی هەرێم بەسەرۆكایەتی مەسرور بارزانی سەرۆكی حكومەت و قوباد تاڵەبانی جێگری سەرۆكی حكومەت بە ئەندامێتی هەریەك لە وەزیرانی ناوخۆ و دارایی و پێشمەرگە و داد سەردانی بەغدا دەكات.

وتیشی: سەردانەكە بەمەبەستی كۆبوونەوە لەگەڵ بەرپرسە باڵاكان و گفتووگۆ كردنە لەسەر دۆزینەوەی رێگەچارەی گونجاو چارەسەركردنی كێشە هەڵپەسێردراوەكان.

ئەمەش لەكاتێكدایە ئەمڕۆ ئەنجومەنی وەزیرانی حكومەتی هەرێمی كوردستان بەسەرۆكایەتی مەسرور بارزانی سەرۆكی حكومەت و قوباد تاڵەبانی جێگری سەرۆكی حكومەت یەكەم كۆبوونەوەی خۆی لەشاری هەولێر ئەنجامدا، هاوكات پێنج وەزارەت پۆستەكانییان ئاڵوگۆڕكرد، بڕیاریشە تا كۆتایی ئەم هەفتەیە سەرجەم وەزارەتەكان پۆستەكانیان ئاڵوگۆڕ بكەن.

PUKmedia  تاژاو محەمەد