سەدامی لەکەرکوک

.

بەبەرچاوی هەموانەوە، بەبێ شەرم و بەبێ ترس لەبەردەم کامێراکان، ژنێک لەکەرکوک هاواری کردو گوتی سەدامیم و بەعسیم.
ئەم ڕوداوە لەڕوکەشدا واسەیردەکرێت کە کاردانەوەیەکی عاتفیەو پێویست ناکات زۆر لەسەری بوترێت و باشترە اهمال بکرێت،کەئەم جۆرە لەبیرکردنەوەو تێگەیشتنە لەخودی ڕووداوەکە ترسناکترە. چونکە ئەو بێشەرمیەی کەئەو ژنەکردی هەروەک زەنگێکی مەترسیدارە بۆ داهاتوی عیراقی نوێ و دەستکەوەتەکانی پڕۆسەسیاسیەکەی، هەروەها بێحورمەتیەکی لەڕادەبەر نائینسانیشە دەرهەق بەمێژووی عیراقی بەرلەساڵی ۲۰۰۳، دەرهەق بەکەسوکاری قوربانیانی عیراقیەکان لەبەسڕەوە بۆ کوردستان، بێحورمەتیە دەرهەق بە کەسوکاری ٥۰۰۰ پەپولەی خنکاوی هەڵەبجە و ۱۸۲ هەزار گۆڕ ونی ئەنفال و هەزاران لەسێدارەدراوی خوشک و براکانمان لەپارێزگاکانی ناوەڕاست و باشوور و بێڕێزیە بەرامبەر وشککرنی هۆڕاوەکان و ڕاپەرینی شەعبان و دەیان حاڵەتی تراژیدی تر. هەروەک ئەم ڕووداوە تەحەدایەکی گەورەی ئێمەیشە وەک نوێنەرانی گەل و پێمان دەڵێ ئەو دەستورەی کەئێوە کردوتانەتە بنەمای کارکردن و ئەو یاسایانەی کەنوێنەران دەریدەکەن بەڕۆژی نیوەڕۆ پێشێلدەکرێن و کەسیش بەدواداچون ناکات بۆ پەراوێزخستنیان و کار وابڕوات هێدی هێدی بەهاو سەنگینی و میسداقیەتی یاساکان لەدەستدەچن.
لەڕووی سایکۆڵۆژیەوە، ئەم ڕوداوە پێمان دەڵێت کەناخی بەشێک لەتاکی عیراقی لەفکرەی بەعسیبون و سەدامیبون پاکنەبوەتەوەو لەهەر کێشەیەکدا پەنای بۆدەبرێت و دەبێتە ئامڕازێک بۆ چارەسەرکردنی کێشەسیاسی و ئیداریەکان و سەدام وەک مۆتەکە لەدوای ۱۳ ساڵ لە ئیعدامکردنی ئێستاش دەکرێتە چەکێک بۆ ترساندنی پاشماوەی قوربانیەکانی ڕابردوو.
ئەمە پەیامێکی وریاکەرەوەیە دەبێت هەموان لێیتێبگەین، بەپەرلەمانتار و ئەنجومەنی نوێنەرانەوە، بەسەرۆک وەزیر و کابینەکەیەوە، بەسەرۆک کۆمار و چەترەدەستوریەکەیەوە پێویست تێبگەین کە شەپۆلی سێیەمی پاشماوەکانی بەعس لەجموجوڵ و پیلانی تازەدان و دەیانەوێت چەقی ئەم پیلانگێڕەیە لەکەرکوک جێبەجێبکەن. هەروەک چۆن شەپۆلی یەکەمی بەعسیەکان هەماهەنگی قاعیدە بوو هەتا تەقاندنەوەی مەزاری هەردوو ئیمامی شیعی هادی و عەسکەری لەشوباتی ۲۰۰٦ و شەپۆلی دوەمیشیان هەماهەنگی داعش و ئەبوبەکری بەغدادی بوە بۆهاتنە ناو خاکی عیراق، ئێستاش بەعسیەکان بەخۆپیشاندان و بەناوی کۆمەڵگەی مەدەنی خەریکی نانەوەی ئاژاوەو فیتنەن لەکەرکوک دەیانەوێت دۆخەکە ببەن بەرەو شەڕو ئاژاوەو ململانێی ئەهلی.
هەربۆیە باشرترن ئەلتەرناتیڤ سەپاندنی یاسا و دەستورە لەکەرکوک، جێبەجێکردنی یاسا بەسەر ئەوانەی کەداوای گەڕانەوەی بەعس دەکەن و جێبەجێکردنی مادەی ۱٤۰ی دەستوور بەسەر ئەو پیلانە ناوخۆیی و ئەجێندا دەرەکیانەی کە دەیانەوێت لەکەرکوکەوە ئاگر بەربدەنە تەواوی عیراق.

د. بەختیار شاوەیس

PUKmedia تایبه‌ت