كاركردن بەپێوەری ئاوی ماڵان رادەگیرێت

.

كاركردن بەپێوەری ئاوی ماڵان راگیراو پارێزگاری دهۆكیش دەڵێت: بەرەڵای و فەوزایەكی زۆر لەجێبەجێكردنی بڕیارەكەدا هەیەو نرخی ئاوی بەكارهاتوو زۆر گرانەو پێویستە پێداچوونەوەی پێدا بكرێت.

ئەمڕۆ 10ی تەموزی 2019، لەپارێزگای دهۆك پارێزگارو ئەنجومەنی بەڕێوەبەرایەتی ئاو و لایەنە پەیوەندیدارەكانی دیكە لەسەر پێوەری ئاوی ماڵان و گلەیی هاووڵاتیان لەهاتنەوەی بڕێكی زۆر پارە بۆیان كۆبوونەوە.

دوای كۆبوونەوەكەش، لەكۆنگرەیەكی رۆژنامەوانیدا فەرهاد ئەتروشی پارێزگای دهۆك رایگەیاند: كاركردنی بەپێوەری ئاوی ماڵان پێویستی بەڕێكخستنەوە هەیەو بۆ دانانی پلانێكی باش دانەنراوەو لەكاتی جێبەجێكردنیدا كێشەی بۆ خەڵك دروستكردوە، بۆیە پێویستە پلانێكی نوێی دابنرێت.

وتیشی: پێداچونەوە جدی بەنرخی ئاوی بەكارهاتوودا بكرێت و ئەوەی لەلایەن وەزارەتی شارەوانییەوە دانراوە لەگەڵی نین و و نایانەوێت نرخی ئاوی بەكارهاتوو گران بێت، چونكە كاركردنی پەپێوەری ئاوی ماڵان بارگرانییەكی زۆری لەسەر خەڵك دروستكردوە.

پارێزگاری دهۆك ئەوەشی وت: لەكۆبوونەوەكەی ئەمڕۆماندا بڕیاریانداوە تا پێوەر بۆ هەموو ماڵەكان دانەنرێت كاركردن بەپێوەر رابگیرێت، چونكە بەرەڵایی و فەوزاییەكی زۆر لەبڕیارەكەدا هەیەو نرخەكەی زۆر زۆرەو پێویستی بەپێداچوونەوەیە. 

ئەتروشی وتیشی: بڕێكی زۆر ئاوی خواردنەوە لەلایەن شوێنە بازرگانییەكانەوە بەكاردەهێنرێت، بەتایبەت لەلایەن ئەو شوێنانەی لەدهۆك ئۆتۆمبێلی تێدا دەشۆردرێت، ئەوەش كاریگەری لەسەر بڕی ئاوی پارێزگاكە كردوەو زیادەڕەوی تێدا دەكرێت و بەمەبەستی بازرگانی بەكاردەهێنرێت.

بەوتەی پارێزگار، ئەو پارە زۆرەشی بۆ هاووڵاتیان هاتووەتەوە لێیان وەرناگیرێت، چونكە دەبێت هەمووی پێكەوە كاربكات و لەخەڵك وەربگرێت.

لای خۆشیەوە فەهیم عەبدوڵا، سەرۆكی ئەنجومەنی پارێزگای دهۆكیش رایگەیاند: بڕیاری كارپێكردنی پێوەری ماڵان نادادپەروەری تێدایەو بڕێكی زۆر پارە بۆ هاووڵاتیان هاتووەتەوە، ئەوەش بارگرانییەكی زۆری لەسەر خەڵكی پارێزگای دهۆك دروستكردوە.

وتیشی: لەماوەیەكی نزیكدا كۆبوونەوەی ئەنجومەن دەكەین و پەیوەندی بەئەنجومەنی پارێزگاكانی دیكەی هەرێمی كوردستانیشەوە دەكەین تا بزانین لەوێش بەهەمان شێوەیە، چونكە ناكرێت خەڵكی دهۆك باجی ئەو بڕیارە بدەن.

PUKmedia تایبەت