ڕیزبه‌ندی نیشتیمانی زانكۆكان ڕاده‌گه‌ێندرێت

.

وه‌زاره‌تی خوێندنی باڵا و توێژینه‌وه‌ی زانستی بۆ ساڵی چواره‌م ڕیزبه‌ندی نیشتیمانی زانكۆكانی كوردستان ڕاده‌گه‌ێنێت.

لێژنه‌ی باڵای ڕیزبه‌ندی نیشتیمانی زانكۆكانی كوردستان له‌ ڕاگه‌یه‌نراوێكدا ڕایده‌گه‌یه‌نێت: ڕیزبه‌ندی نیشتیمانی زانكۆكان یه‌كێك له‌پڕۆژه‌ گرنگ و كاریگه‌ره‌كانی وه‌زاره‌تی خوێندنی باڵا و توێژینه‌وه‌ی زانستی، چونكه‌ جێبه‌جێكردنی ئه‌و پڕۆژه‌یه‌ له‌ ماوه‌ی ڕابردو كاریگه‌ری زۆری خستۆته‌ سه‌ر پێشكه‌وتنی زانكۆكان و، ئاشناكردنی زانكۆكان به‌كۆمه‌ڵێك به‌های نوێ.

له‌ ڕاگه‌یه‌نراوه‌كه‌دا ئه‌وه‌ش هاتووه‌: له‌ئێستادا كاروباره‌ ته‌كنیكی و تایبه‌ته‌كانی په‌یوه‌ست به‌ ڕێزبه‌ندی نیشتیمانی زانكۆكان  به‌شێوه‌یه‌كی سه‌ركه‌وتوو به‌ڕێوه‌ده‌چێت و واش بڕیاره‌ ئه‌مساڵیش له‌ ناوه‌ڕاستی مانگی ئه‌یلول بۆ جاری چواره‌م ڕیزبه‌ندی نیشتیمانی زانكۆكان ڕابگه‌یه‌نرێت.

لێژنه‌ی باڵای ڕیزبه‌ندی نیشتیمانی زانكۆكانی كوردستان دوپاتیشی ده‌كاته‌وه‌: پرۆسه‌ی ڕیزبه‌ندی زانكۆكان پشت به‌ (8) پێوه‌ری سه‌ره‌كی و، (47) پێوه‌ری لاوه‌كی ده‌به‌ستێت، جێبه‌جێكردنی پڕۆژه‌ی ڕیزبه‌ندی نیشتیمانی زانكۆكان گۆڕانكاری زۆر گرنگی له‌گه‌ڵ خۆی هێنا، كلتوری كێبڕكێی زانستی تۆخكرده‌وه‌و، پێوه‌ر و ستاندارد و كلتوری نوێی هێنایه‌ ناو ئه‌زمونی ئه‌كادیمیای كوردستان.

PUKmedia به‌ڕێوه‌به‌رایه‌تی ڕاگه‌یاندنی وه‌زاره‌ت