توورێكى قوڕاوى

× ئه‌وه‌ سه‌رمان بڕى و كه‌وڵیشمان كرد.. ئیتر ئه‌مرت به‌ چى یه‌؟
ـ ئه‌مرى بۆ چى یه‌ باوكى من؟.. بیكه‌ن به‌ خێر.. جوان جوان به‌ش به‌شى بكه‌ن و هه‌ر به‌شه‌ى بده‌ن به‌ ماڵى موسته‌حه‌قێ.
× به‌سه‌رچاو ئه‌مر ئه‌كه‌ى..جگه‌ر و گون و گورچیله‌كه‌شى؟
ـ نا.. ئه‌وه‌ دابنێ ئێواره‌ ئه‌یبرژێنین.. له‌گه‌ڵ دوگه‌كه‌ى و پشته‌مه‌غزه‌كه‌ى.
× یه‌عنى ئه‌وانه‌ به‌ش به‌ش نه‌كه‌ین؟
ـ نا.. خۆمان ئه‌و تۆزه‌مان هه‌ر به‌ر ئه‌كه‌وێ..بیرت نه‌چێ رانێكى ساغیش بنێرى بۆ ماڵى داده‌ نه‌سرینت.
× رانێك؟!
ـ ئه‌ى چۆن كوڕم.. ئه‌ڵێ خێر بۆ خۆیش نه‌ك بۆ ده‌روێش.. ئا بیرم نه‌بوو.. كاك دكتۆر زۆر حه‌زى له‌ په‌راسووه‌، ئه‌ویش له‌گه‌ڵ سى و جگه‌ره‌كه‌دا دابنێ.
× هه‌موو په‌راسووه‌كان؟!!
ـ ئا..ئا.. ئێسقانه‌كانى پشتیشى جیابكه‌ره‌وه‌ بۆ دایكت ده‌مێكه‌ ئه‌ڵێ حه‌زم له‌ تشریبه‌.. گه‌رده‌مله‌كه‌شت بیرنه‌چێ باوكه‌كه‌مى.
× جا هه‌ڤاڵ گیان خۆ هیچى واى نه‌مایه‌وه‌.
ـ ره‌حمه‌ت له‌ باوكت.. به‌و هه‌ڤاڵه‌تا هینم بیركه‌وته‌وه‌، ماڵى مامه‌ حه‌مه‌كه‌ریمت.. به‌ قورعان رانێكیان بۆ نه‌نێرین ئه‌مانكات به‌ فلیم.
× رانێك زۆره‌.. با ده‌ستێكیان بۆ جیا بكه‌مه‌وه‌.
ـ نا نا.. ده‌سته‌كان وه‌عدم به‌ كاك عه‌بدوڵـڵاى شه‌ریكم داوه‌.. جومعه‌ ئه‌چن بۆ سه‌یران گۆشت و شتیان پێ نابێ.
× جا هیچ نه‌مایه‌وه‌ قوربان.. مه‌گه‌ر هه‌ر سه‌روپێ و ناوسكه‌كه‌ى بكه‌ین به‌خێر.
ـ توو شه‌ره‌فت تۆ زه‌لامى هه‌تیو؟!! كه‌س هه‌یه‌ دڵى بێ ئه‌و سه‌روپێ ناسكه‌ بكات به‌ خێر؟؟ كۆى بكه‌ره‌وه‌ دوایى ئافره‌ته‌كان خۆشى ئه‌كه‌ن.
× به‌ڕاستى خێركردن هه‌ر وا ئه‌بێ.. ده‌سته‌كانت خۆش.
ـ ده‌ستخۆشیى ناوێ... ئینسان ئه‌گه‌ر ره‌حمى له‌ دڵدا نه‌بێ توورێكى قوڕاوى ناهێنێ.