ئاوا مه‌به‌ ئه‌ی هه‌تاوی ئاسمان

.

ئه‌و خۆی خاوه‌نی كوردستانه‌، كوردستان به‌ مانای سنه‌ و به‌مانای سه‌رتاسه‌ری كوردستانیش. ئه‌وانی تر زائلن. بێگانه‌ن، دێن و ده‌ڕۆن، ھه‌ر ھونه‌ر نه‌مره‌.
مه‌زهه‌ری خالقی به‌ هونه‌ری به‌رز و ده‌نگی جاودیدانی، شوێنی خۆی له‌ دڵی ئێمه‌ داگیركردووه‌، به‌ڵام داگیركه‌رێك به‌ چه‌مكی هونه‌ر و ره‌هه‌نده‌كانی بژوێنی ژیان و ئاوه‌دانی، نه‌ك به‌ مانا ناخۆشه‌كه‌ی داگیركه‌ری پێ ده‌ناسرێته‌وه‌.

ئه‌و خۆی نیشتمانێكه‌ سه‌ربه‌خۆ كه‌ خاوه‌نی به‌یداغ و مارش و ئه‌یوانی خۆیه‌تی. ئه‌مانه‌ پێوه‌ره‌كانی هونه‌ری به‌رزن و هه‌قیان به‌سه‌ر قیل و قاله‌وه‌ نییه‌، هه‌قیان به‌ هه‌ڵبه‌زو دابه‌زی سیاسه‌ته‌وه‌ نییه‌.

له‌ ئای شله‌وه‌ تا كه‌ومل ، ھه‌ر پێوه‌ره‌ ئه‌زه‌لییه‌كانی فه‌رهه‌نگ و شارستانی تێپه‌ڕی سنوور و توخوبه‌كان رۆح و نه‌زه‌ری مامۆستا خالقی ده‌به‌ن به‌ڕێوه‌و كوردبوون و شوناسی هونه‌ره‌كه‌ی دیاری ده‌كه‌ن.

له‌بیرمه‌ جارێكیان خالقی وتی حه‌زم لێ بوو گۆرانی كه‌ ده‌ڵێن ئه‌مڕۆ ده‌شت و كێو شینه‌ بڵێم. وه‌ك یادگاری پێره‌مێردی شاعیر و ده‌نگخۆشی مه‌لاكه‌ریم، نه‌متوانی.

به‌و ئاوازه‌ گۆرانییه‌كی تر و شتێكی تری وت . له‌ دوای چه‌ند ده‌یه‌ ئاواتی هاته‌ دی و ئاواز و گۆرانی، شیعر و ده‌قی لێكدا. یادی مامه‌یاره‌ی زیندوو كرده‌وه‌.
ئاواتێكی تریشی ھاته‌دی: له‌شاره‌وه‌ بۆ شار: له‌ سلێمانییه‌وه‌ بۆ سنه‌ كه‌ سه‌ردانه‌كه‌ی وشكه‌ سۆفیشی خسته‌ گۆرانی.

به‌ری دوو ده‌یه‌ نووسیم و ئیمزام كرد خۆشه‌ كه‌ كورد بیت، چونكه‌ كوردبوون واتا تێگه‌یشتن له‌ هونه‌ری خالقی. شتێك كه‌ نه‌ته‌وه‌كانی تری دونیا ده‌توانن هه‌ر به‌ خه‌یاڵ و هه‌ست كه‌ ئه‌ویش كه‌م نییه‌ پێشبینی بكه‌ن، به‌ڵام كوردبوون واتا ده‌زانیت ئاهوناڵه‌ و خۆزگه‌و هه‌ناسه‌ و داخی وتن و ئینجا مانای وتنی خالقی بۆ چییه‌ و له‌پێناوی چییه‌؟ خۆشه‌ كه‌ كورد بیت و له‌ شوێنان بڵێی له‌و نه‌ته‌وه‌یه‌م كه‌ خالقی لێبووه‌. له‌و نه‌ته‌وه‌یه‌م سه‌ره‌ڕای زوڵم و زۆری عه‌ره‌ب و عه‌جه‌م و تۆران توانیویه‌تی داھێنه‌ر و خالقی مامۆستا خالقی بێت. ئوستادێك كه‌ چۆن نالی له‌وه‌سفی دیوانی خۆیدا ده‌یگوت فارس و كوردو عه‌ره‌ب هه‌رسێكم به‌ده‌فته‌ر گرتووه‌ و شێخ ره‌زا ده‌یگوت زوبده‌ی مه‌تاعی حیكمه‌ته‌ ئه‌م شیعری كوردییه‌، ده‌توانین ئێمه‌ له‌ جیاتی قه‌زاوه‌تی فه‌رهه‌نگ بڵێین مامۆستا خالقی به‌ یه‌ك قوڕگی ئاوه‌دان و له‌رینه‌وه‌ی مامۆستایانه‌ هونه‌ری ئوستاد رۆح الله‌ خالقی و ئوستاد غولام به‌نانی تێپه‌ڕاندووه‌ و تێكه‌ڵی رۆحی به‌رزی كوردانه‌ی كردووه‌، به‌رز وه‌ك ئاویه‌ر و هه‌ڵگورد.

له‌ ئێمه‌ی ئه‌هلی شرۆڤه‌ی سیاسیی بپرسن، ده‌ڵێین ئه‌وه‌ی خالقی ده‌یكاو ده‌یڵێ، باشترینه‌. ھه‌رزانه‌ بێ موباله‌غه‌ حه‌رفی به‌ گه‌وھه‌رێ.
ئه‌وه‌ی سیاسییه‌كان ده‌یكه‌ن خه‌باته‌ و ئیجتیهاده‌، جا ده‌یگرێ، یان به‌رھه‌می دوا ده‌كه‌وێت، به‌س ئه‌وه‌ی مامۆستا خالقی ده‌یكات به‌قای بۆ هه‌یه‌. ھه‌ر ھونه‌ر نه‌مره‌ ھونه‌روه‌ر مه‌رد و ره‌ند.

ھاتی ئاواتی دێرین به‌خێربێیته‌وه‌ ئاواتی دێرین

هاتی ئاواتی دێرین، قیبله‌ی دڵم له‌لات بوو
مونسم له‌ دووریی تۆ، یادی ئاخر نیگات بوو

 ستران عه‌بدوڵڵا

PUKmedia  كوردستانی نوێ