داوای هه‌ماهه‌نگی پێشمه‌رگه‌و هێزه‌ عیراقییه‌كان ده‌كرێت

.

شاره‌زایه‌كی بواری سه‌ربازی سه‌رهه‌ڵدانه‌وه‌ی داعش له‌عیراق به‌دوور نازانێت و داوا ده‌كات هه‌ماهه‌نگی زیاتر له‌نێوان پێشمه‌رگه‌و هێزه‌عیراقییه‌كان هه‌بێت.

له‌و باره‌یه‌وه‌ هیشام ئه‌لهاشمی شاره‌زای بواری سه‌ربازی له‌ عیراق سه‌رهه‌ڵدانه‌وه‌ی تیرۆرستانی داعشی له‌عیراق و سوریا به‌دوورنه‌زانی و داواشی له‌سوپای عیراق و هێزی پێشمه‌رگه‌ كرد له‌پێناو رێگرتن له‌سه‌رهه‌ڵدانه‌وه‌ی داعش هه‌ماهه‌نگی زیاتر بكه‌ن.

هیشام ئه‌لهاشمی بۆ PUKmedia وتیشی: پێشمه‌رگه‌ هێزێكی كاریگه‌ره‌ له‌عیراق و له‌كاتی رزگاركردنی نه‌ینه‌وادا توانیویه‌تی 19 یه‌كه‌ی ئیداریی له‌چنگ داعش ده‌ربهێنێت و رزگاریان بكات.

ئه‌وه‌شی خسته‌ڕوو: پێویسته‌ پێشمه‌رگه‌و هێزه‌ئه‌منییه‌كانی عیراق هه‌واڵگیرییه‌كانیان زیاتر به‌هێزبكه‌ن و رێگربن له‌دوووباره‌ سه‌رهه‌ڵدانه‌وه‌ی داعش له‌عیراق.

ئه‌مه‌ش له‌كاتێكدایه‌، دوێنێ 1-7-2019 رۆژنامه‌یه‌كی ئه‌مریكی له‌ راپۆرتێكدا له‌زاری چه‌ند سه‌رچاوه‌یه‌كی ئه‌منییه‌وه‌ مه‌ترسی دووباره‌ سه‌رهه‌ڵدانه‌وه‌ی داعشی به‌هێزێكی نوێوه‌ له‌عیراق و سوریا خستوه‌ته‌ڕوو و ئاماژه‌ی بۆ ئه‌وه‌شكردوه‌، داعش به‌نیازه‌ خۆی رێكبخاته‌وه‌و بێته‌وه‌ ناوچه‌كه‌.

PUKmedia تایبه‌ت