ناوه‌ندی ده‌ره‌وه‌ به‌ڵێن بۆ مام دووپاتده‌كه‌نه‌وه‌

.

به‌ سه‌رپه‌رشتی خاتوو شاناز برایم ئه‌حمه‌د ناوه‌ندی ده‌ره‌وه‌ی یه‌كێتیی نیشتمانیی كوردستان به‌دروشمی" به‌خۆداچوونه‌ و نوێبوونه‌وه‌، ئامڕازی به‌ره‌وپێشچوونه‌ " له‌هۆڵی خاك له‌شاری سلێمانی كۆبوه‌وه‌.

به‌ ئاماده‌بوونی خاتوو شاناز برایم ئه‌حمه‌د لێپرسراوی ناوه‌ندی ده‌ره‌وه‌ی یه‌كێتیی نیشتمانیی كوردستان و هه‌ڵۆ پێنجوێنی ئه‌ندامی سه‌ركردایه‌تی یه‌كێتیی و نوێنه‌ری مه‌كته‌ب ڕێكخستن و هاوار حاجی جێگری لێپرسراوی ناوه‌ندی ده‌ره‌وه‌، ئه‌نجومه‌نی ناوه‌ندی ده‌ره‌وه‌ی یه‌كێتیی، سه‌ردانی ئارمگای سه‌رۆك مام جه‌لال-یان كرد، له‌گه‌ڵ دانانی گوڵی وه‌فا و خۆشه‌ویستی به‌ڵێنی به‌رده‌وامیدانیان له‌سه‌ر رێبازه‌كه‌ی دووپاتكرده‌وه‌، دواتریش له‌هۆڵی خاك له‌شاری سلێمانی كۆبوونه‌وه‌.

رۆژانی 25 و 26 و 27ی ئه‌م مانگه‌ له‌شاری سلێمانی، ناوه‌ندی ده‌ره‌وه‌، له‌ژێر دروشمی " به‌خۆداچوونه‌ و نوێبوونه‌وه‌، ئامڕازی به‌ره‌وپێشچوونه‌ "، كۆبونه‌وه‌ی ناوخۆی رێكده‌خات، بۆ ئه‌وه‌ مه‌به‌سته‌ش جگه‌ له‌كۆبوونه‌وه‌ی ناوخۆی ناوه‌ندی ده‌ره‌وه‌، له‌گه‌ڵ به‌شێك له‌ئۆرگان و مه‌كته‌به‌كانی یه‌كێتیی كۆده‌بنه‌وه‌، بۆ لێكتێگه‌یشتن و هه‌ماهه‌نگی زیاتر له‌ نێوانیان.

كۆبوونه‌وه‌كان 3 رۆژ ده‌خایه‌نێت و له‌رۆژانی یه‌كه‌م و سێیه‌مدا كۆبوونه‌وه‌ی ناوه‌ندی ده‌ره‌وه‌ ده‌كرێت و له‌ رۆژی دووه‌میش له‌گه‌ڵ به‌شێك ئۆرگان و مه‌كته‌به‌كانی یه‌كێتیی كۆده‌بنه‌وه‌.

له‌كۆبونه‌وه‌كه‌ی ئه‌مڕۆدا، دوای چه‌ند ساتێك ڕاوه‌ستان بۆ گیانی پاكی شه‌هیدان، به‌رنامه‌ی كۆبونه‌وه‌كه‌ له‌لایه‌ن هاوار حاجی جێگری لێپرسراوی ناوه‌ندی ده‌ره‌وه‌ خوێندرایه‌وه‌ و به‌ وردی تاوتوێی بارودۆخی كوردستان و دۆخی یه‌كێتیی له‌گشت روویه‌كه‌وه‌ به‌تایبه‌ت دۆخی ڕێكخستنه‌كانی یه‌كێتیی له‌ ده‌ره‌وه‌ی وڵات كرا.

PUKmedia تایبه‌ت