هاتوچۆی هه‌ولێر هۆشداری ده‌دات

.

وته‌بێژی هاتوچۆی هه‌ولێر له‌باره‌ی سه‌رهه‌ڵدانی دیارده‌ی فرۆشتن له‌ لاشه‌ی ئۆتۆمبێل له‌سه‌ر شه‌قامه‌كان هۆشداری ده‌دات و ده‌ڵێت،  ئه‌و دیارده‌یه‌ بووه‌ته‌ سه‌رچاوه‌ی پشێوی و داوا له‌ شاره‌وانییش ده‌كات رێوشوێنی پێویست بگرنه‌به‌ر.

فازڵ حاجی وته‌بێژی به‌ڕێوه‌به‌رایه‌تی هاتوچۆی هه‌ولێر ئه‌مڕۆ سێشه‌ممه‌ 25-6-2019، له‌په‌ڕه‌ی تایبه‌تی خۆی له‌فه‌یسبووك بڵاویكرده‌وه‌، بوونی لاشه‌ی ئۆتۆمبێلی بارهه‌ڵگر و پیكابی له‌كاركه‌وتوو له‌ ته‌نیشتی رێگاكان خه‌ریكه‌ له‌ زۆرێك له‌ شه‌قامه‌كان ده‌بێت به‌ دیارده‌ و كڕین و فرۆشتنیان تێدا ده‌كرێت، وه‌ك ئه‌وه‌ی شوێنه‌كان موڵكی كه‌سی بێت.

ئاماژه‌ی به‌وه‌شكردووه‌، ئه‌و دیارده‌یه‌ جگه‌ له‌ ناشیرینی دیمه‌نه‌كه‌ی، سه‌رچاوه‌ی قه‌ره‌باڵغی به‌رده‌وامه‌ و سه‌رچاوه‌ی دروستبوونی پشێویه‌ له‌ شه‌قامه‌كان.

وته‌بێژی به‌ڕێوه‌به‌رایه‌تی هاتوچۆی هه‌ولێر داواشی له‌ شاره‌وانی كردووه‌، هه‌ڵمه‌تێك ئه‌نجام بدات بۆ لابردنی لاشه‌ی ئه‌و ئۆتۆمبێلانه‌ له‌سه‌ر شه‌قامه‌كان و هه‌روه‌ها سزای ئه‌و كه‌سانه‌ش بدات كه‌ ئه‌و كاره‌ دووباره‌ ده‌كه‌نه‌وه‌.

PUKmedia تایبه‌ت