ئه‌ڵمانیا داوای لێكۆڵینه‌وه‌ له‌هێرشه‌كه‌ی كه‌نداو ده‌كات

.

دوای ئه‌و هێرشه‌ی كرایه‌ سه‌ر كه‌شتی گواستنه‌وه‌ی نه‌وتی كه‌نداوی عومان ناوچه‌كه‌ ئاڵۆزبوونێكی مه‌ترسیداری به‌خۆوه‌ بینیوه‌ به‌تایبه‌تی دوای ئه‌وه‌ی ئه‌مریكا، ئێران به‌ئه‌نجامدانی ئه‌و هێرشه‌ تۆمه‌تبار ده‌كات.

سیاسه‌تمه‌دارانی ئه‌ڵمانی هۆشداری ده‌ده‌ن و داوا ده‌كه‌ن لایه‌نه‌كان دانبه‌خۆیاندا بگرن.

له‌م باره‌یه‌وه‌ به‌رپرسی سیاسه‌تی ده‌ره‌وه‌ی پارتی سه‌وزه‌كانی ئه‌ڵمانیا كه‌ هه‌مانكات به‌رپرسی لیژنه‌ی كاروباری ده‌ره‌وه‌ی په‌رله‌مانی ئه‌ڵمانیه‌ ئه‌مڕۆ 15ی حوزه‌یرانی  2019 داوایكرد لێكۆڵینه‌وه‌یه‌كی نێوده‌وڵه‌تی بێلایه‌ن له‌ڕوداوه‌كه‌ ئه‌نجامبدرێت.

ئه‌م سیاسه‌تمه‌داره‌ ده‌ڵێت، به‌رله‌وه‌ی ڕه‌وشه‌كه‌ له‌ده‌ست ده‌رچێت ده‌بێت ڕێگه‌ له‌هه‌ڵه‌شه‌یی و به‌رپاكردنی جه‌نگ بگیرێ و ئازادی هاتوچۆی نێوده‌وڵه‌تی له‌ده‌ریاكاندا پارێزراوبێت.لای خۆشیه‌وه‌"ڕولف مۆتسنیش"سه‌رۆكی كاتی فراكسیۆنی پارتی سوسیال دیموكراته‌كانی ئه‌ڵمانیا له‌به‌رده‌م په‌رله‌ماندا وتی، ئه‌م قه‌یرانه‌ نێوده‌وڵه‌تیه‌ كه‌ئێستا مه‌ترسی دروستكردوه‌ هه‌روا به‌ئاسانی به‌سه‌ر ئه‌وروپادا تێناپه‌ڕێت وكاریگه‌ری خراپی ده‌بێت.

هه‌مانكات "ڕاینهارد بوتیكوفه‌ر"سه‌رۆكی فراكسیۆنی سه‌وزه‌كان له‌په‌رله‌مانی ئه‌وروپی له‌م باره‌یه‌وه‌ وتی، هه‌ردوو لایه‌نی كێشه‌كه‌ خه‌ڵكانی توندره‌و رۆڵی تیا ده‌بینن و كوێرانه‌ یه‌كتر ده‌وروژێنن..!!

داواشیكرد ده‌رفه‌تی هێوربونه‌وه‌ له‌ده‌ستنه‌ده‌ن و هه‌وڵه‌كه‌ی سه‌ره‌ك وه‌زیرانی یابان به‌هه‌ند وه‌رگرن.

له‌سه‌ر ئاستی فه‌رمیش وته‌بێژی وه‌زاره‌تی ده‌ره‌وه‌ی ئه‌ڵمانیا "ئولریكه‌ دیمر"ڕایگه‌یاند، هه‌واڵه‌كان جێی نیگه‌رانین جه‌ختیشكرده‌وه‌ كه‌ده‌بێت لایه‌نه‌كان خۆیان به‌دوور بگرن له‌هه‌ر په‌ره‌ سه‌ندنێكی مه‌ترسیدار له‌ناوچه‌كه‌داو وتیشی، لایه‌نه‌كان نابێت بچنه‌ بازنه‌ی ئاڵۆزكردن و سوڕانه‌وه‌ به‌ده‌وری مه‌ترسیه‌كاندا پێشی وابوو هێرش بۆسه‌ر ئه‌و كه‌شتیانه‌ مه‌ترسیه‌ له‌سه‌ر هاتوچۆی ده‌ریایی نێوده‌وڵه‌تی و هه‌ڕه‌شه‌شه‌ بۆ سه‌ر ئاشتی جیهان.

PUKmedia شیهاب عوسمان/ئه‌ڵمانیا

س: میدیاكانی ئه‌ڵمانیا