سلێمانی.. كارگه‌یه‌كی شیرینی داده‌خرێت

.

لیژنه‌ هاوبه‌شه‌كانی قائیمقامیه‌تی سلێمانی كارگه‌ی شیرینی یه‌ڵدا داده‌خات و قائیمقامیه‌تیش رایده‌گه‌یه‌نێت، بڕیاره‌كه‌ به‌هۆی پابه‌ندنه‌بوونی كارگه‌كه‌یه‌ به‌ مه‌رج و رێنماییه‌كانی كاركردن و ته‌ندروستی.

قائیمقامیه‌تی سلێمانی رایگه‌یاند، ئه‌مڕۆ سێشه‌ممه‌ لیژنه‌ی سێی سه‌ر به‌ لیژنه‌ هاوبه‌شه‌كان، سه‌ردانی كارگه‌ی شیرینی (یه‌ڵدا)ی‌ له‌ شه‌قامی مه‌وله‌وی كردووه‌ و ده‌ركه‌وتووه‌ كارگه‌كه‌ پابه‌ندی مه‌رج و رێنماییه‌كانی كاركردن به‌ گشتی و ته‌ندروستی به‌تایبه‌ت نه‌بووه‌.

ئاماژه‌ی به‌وه‌شداوه‌، له‌كاتی سه‌ردانی لیژنه‌كه‌دا ده‌ركه‌وتووه‌، له‌ناو ئه‌و كاكڵه‌ گوێز و كونجییه‌ی له‌كاتی ئاماده‌كردنی شیرینیه‌كاندا به‌كارده‌هێنرێت بڕێكی زۆر پاشه‌ڕۆی قرتێنه‌ره‌كان (مشك و جرج)ی تێدابووه‌، هه‌روه‌ها ئه‌و كه‌سانه‌ی له‌ كارگه‌كه‌ كاریان كردوه‌ گرنگییان به‌ پاك و خاوێنی شوێنه‌كه‌ نه‌داوه‌، له‌گه‌ڵ به‌سه‌رچوونی مۆڵه‌تی ته‌ندروستی كاركردن.

راشیگه‌یاندووه‌، به‌فه‌رمانی قائیمقامی سلێمانی، كارگه‌ی شیرینی یه‌ڵدا داده‌خرێت و ته‌واوی ئه‌و مادده‌ خۆراكیانه‌ی ده‌ستی به‌سه‌ردا گیراوه‌ له‌لایه‌ن لیژنه‌ی له‌ناوبردنه‌وه‌ له‌ناوده‌برێت و خاوه‌نی شوێنه‌كه‌ش رووبه‌ڕووی رێكاری یاسایی ده‌كرێته‌وه‌.

هاوكات هه‌ر ئه‌مڕۆش به‌هۆی به‌سه‌رچوونی ماوه‌كه‌یانه‌وه‌،‌ لیژنه‌ی هاوبه‌شه‌كان بڕێكی زۆر مادده‌ی پاككه‌ره‌وه‌ یان له‌ناوبرد، كه‌خراپ بوون و شیاوی به‌كارهێنان نه‌بوون.

پاككه‌ره‌وه‌كان 200 پارچه‌ ‌بوون و جۆره‌كانیشیان له‌ شامپۆ، زاهی قاپ شتن، سابوون و فاست پێكهاتووه‌.

به‌فه‌رمانی قائیمقامی سلێمانی سه‌رجه‌م ئه‌و ماددانه‌ له‌لایه‌ن لیژنه‌ی له‌ناوبردنه‌وه‌ له‌ناوده‌برێت، له‌كاتی بازاڕكردن و ‌ كڕینی ئه‌و پێداویستیانه‌ی رۆژانه‌ به‌كاری ده‌هێنن، به‌وردی سه‌رنجی مێژووی دروستكردن و به‌سه‌رچوونی كاڵاوشمه‌كه‌كان بده‌ و له‌كاتی هه‌بوونی كاڵای ماوه ‌به‌سه‌رچوودا لیژنه‌ هاوبه‌شه‌كانی لێ ئاگادار بكه‌ره‌وه‌. 

PUKmedia راگه‌یاندنی قائیمقامیه‌تی سلێمانی