قائیمقامی سلێمانی: ئه‌وه‌ی پێویستبێت بۆ هاووڵاتییان ده‌یكه‌ین

.

قائیمقامی سلێمانی رایده‌گه‌یه‌نێت، لیژنه‌ هاوبه‌شه‌كان رۆڵێكی گرنگ و به‌رچاو ده‌بینن له‌ پارێزگاری كردن له‌ ته‌ندروستی هاووڵاتییان و رێگری كردن له‌ هه‌ر جۆره‌ سه‌رپێچیه‌ك كه‌ زیان به‌ به‌رژه‌وه‌ندی گشتی بگه‌یه‌نێت ده‌شڵێت، ئامانجی لیژنه‌كان داكۆكی كردنه‌ له‌ كۆی تاكه‌كانی كۆمه‌ڵگه‌و پاراستنی به‌رژه‌وه‌ندییه‌كانیان به‌شێوه‌یه‌كی یه‌كسان و دادپه‌روه‌رانه‌ .

ئه‌مڕۆ دووشه‌ممه‌ 2019-6-10 ئاوات محه‌مه‌د قائیمقامی سلێمانی له‌گه‌ڵ ئه‌ندامانی لیژنه‌هاوبه‌شه‌كانی قائیمقامیه‌تی سلێمانی كۆبووه‌وه‌ و هه‌ڵسه‌نگاندن بۆ كارو به‌دواداچونه‌كانی لیژنه‌كان كرا .

له‌به‌رامبه‌ر ئه‌و ئه‌ركه‌ گرنگه‌ی كه‌ جێبه‌جێ ده‌كه‌ن قائیمقامی سلێمانی ده‌ستخۆشی له‌ هه‌موو ئه‌ندامانی لیژنه‌هاوبه‌شه‌كانی قائیمقامیه‌تی سلێمانی كرد و رایگه‌یاند: لیژنه‌كان ئه‌ركێكی گرنگ و به‌رپرسیارییه‌تیه‌كی گه‌وره‌یان له‌ ئه‌ستۆدایه‌ كه‌ ئه‌ویش پارێزگاری كردنه‌ له‌ ته‌ندروستی هاووڵاتییان و رێگری كردن له‌ هه‌ر جۆره‌ سه‌رپێچیه‌ك كه‌ زیان به‌ به‌رژه‌وه‌ندی بگه‌یه‌نێت.

ئاوات محه‌مه‌د وتیشی: ئه‌وه‌ی پێویست بێت بۆ سه‌لامه‌تی ته‌ندروستی هاووڵاتییان و پارێزگاری كردن له‌ به‌رژه‌وه‌ندی گشتی خه‌ڵك له‌رێگه‌ی لیژنه‌هاوبه‌شه‌كانه‌وه‌ هه‌نگاوی بۆ ده‌نێین و كاری پێویستیش ده‌كه‌ن بۆ رێكخستنه‌وه‌ی ئیش و كاری كاسبكاران و هه‌موو پیشه‌ جیاوازه‌كان، به‌و ئامانجه‌ی دادپه‌روه‌ری گشتی و كۆمه‌ڵایه‌تی له‌ كارو به‌دواداچونه‌كانی لیژنه‌هاوبه‌شه‌كان له‌ ئاستێكی باڵادا به‌دی بێت، ئه‌وه‌شی خسته‌ڕوو لیژنه‌هاوبه‌شه‌كان به‌یه‌ك دووری له‌ نێوان هاووڵاتییان و كاسبكاراندا كارو باری بازاڕ و پیشه‌ جیاوازه‌كان رێكده‌خات و ئامانجی لیژنه‌كانیش داكۆكی كردنه‌ له‌ كۆی تاكه‌كانی كۆمه‌ڵگه‌و پاراستنی به‌رژه‌وه‌ندییه‌كانیان به‌شێوه‌یه‌كی دادپه‌روه‌ر و یه‌كسان.

له‌ باره‌ی چاودێری و به‌دواداچونه‌كانی لیژنه‌هاوبه‌شه‌كان قائیمقامی سلێمانی داوای له‌ ئه‌ندامانی لیژنه‌هاوبه‌شه‌كان كرد به‌هه‌مان گوڕوتینه‌وه‌ به‌رده‌وامبن له‌ به‌جێهێنانی ئه‌ركه‌كانیان و به‌شێوه‌یه‌كی دروست مامه‌ڵه‌ له‌گه‌ڵ هه‌موو ئه‌و كه‌سانه‌دا بكه‌ن كه‌ رۆژانه‌ سه‌ردانیان ده‌كه‌ن و سزاكانیشیان دادپه‌روه‌رانه‌ بێت به‌سه‌ر ئه‌و كه‌سانه‌ی كه‌ سه‌رپێچیان هه‌یه‌.

وتیشی: به‌هۆی گرنگی كارو ئه‌ركه‌كانی لیژنه‌كانه‌وه‌ گرنگی زیاتر به‌ لیژنه‌هاوبه‌شه‌كانی قائیمقامیه‌تی سلێمانی ده‌ده‌ن و له‌ پێناو زیادكردنی سه‌ردان و چاودێرییه‌كانیان هه‌موو پێداویستیه‌كانیان دابین ده‌كه‌ن .
 
PUKmedia راگه‌یاندنی قائیمقامیه‌تی سلێمانی