بافڵ تاڵه‌بانی: كه‌ركوك به‌شێكی گرنگی جه‌سته‌ی یه‌كێتییه‌

.

به‌بۆنه‌ی یادی 44 ساڵه‌ی دامه‌زراندنی یه‌كێتیی نیشتمانیی كوردستانه‌وه‌، بافڵ تاڵه‌بانی په‌یامێكی پیرۆزبای ئاڕاسته‌ی كه‌سوكاری سه‌ربه‌رزی شه‌ھیدان و پێشمه‌رگه‌ دێرینه‌كان و ئه‌ندامان و لایه‌نگرانی یه‌كێتیی ده‌كات و رایده‌گه‌یه‌نێت، به‌ره‌و قۆناغێكی نوێی سیاسی ھه‌نگاوده‌نێین و كۆنگره‌ی نوێبوونه‌وه‌ و به‌ھێزتركردنه‌ و خۆڕێكخستنه‌وه‌ ده‌به‌ستین.

ده‌قی په‌یامه‌كه‌...
كه‌سوكاری سه‌ربه‌رزی شه‌ھیدان و ئه‌نفالكراوان زیندانیانی سیاسی و پێشمه‌رگه‌ دێرینه‌كان
 كادیره‌ تێكۆشه‌ره‌ دێرینه‌كان و كادیر و ئه‌ندامان و لایه‌نگران
 پێشمه‌رگه‌كانی یه‌كێتیی نیشتیمانیی كوردستان دۆستانی یه‌كێتیی. 

له‌ ساڵیادی دامه‌زراندنی یه‌كێتییه‌كه‌تاندا گه‌رمترین پیرۆزبایتان لێده‌كه‌م

ئه‌مڕۆ بۆ ئێمه‌ی یه‌كێتییه‌كان رۆژێكی مێژووییه‌ رۆژی به‌زیندوھێشتنه‌وه‌ی چل و چوار ساڵ خه‌باتی رێكخستن و زیندان و شار و شاخ و قوربانیدان و خوێن به‌خشینه‌ رۆژی به‌رده‌وامی خه‌بات و جۆشدانه‌وه‌ی گیانی یه‌كێتیی بوون و ته‌واوكردنی به‌رنامه‌كه‌ی ھه‌ڤاڵ مام جه‌لاله‌

ده‌رفه‌تم بده‌ن یه‌كێتییه‌كان له‌م رۆژی وه‌فادارییه‌دا دڵنیاتان بكه‌مه‌وه‌ كه‌به‌ره‌ و قۆناغێكی نوێی سیاسی ھه‌نگاوده‌نێین و كۆنگره‌ی نوێبوونه‌وه‌ و به‌ھێزتركردنه‌و خۆڕێكخستنه‌وه‌ ده‌به‌ستین روحی شه‌ھیدانمان و رابه‌رمان ھه‌ڤاڵ مام جه‌لال ئاسوده‌كه‌ین و دڵی تێكۆشه‌رو پێشمه‌رگه‌و دۆستانمان شاد ده‌كه‌ین.

لێره‌ به‌دواوه‌ ئه‌ركی ھه‌موومانه‌ گیانی پێكه‌وه‌یی و برایه‌تی زیندوبكه‌ینه‌وه‌ كاربكه‌ین بۆ كوردستانێكی ئاوه‌دانترو به‌ھێزتر كه‌ بۆ ئه‌وه‌ش پێویستمان به‌ چه‌پكه‌گوڵه‌كه‌ی مام جه‌لال ده‌بێت.

بۆ حكومڕانیه‌كی نوێش له‌ ھه‌رێم كارده‌كه‌ین یاسا سه‌روه‌ری و مرۆڤ سالاری دروشمه‌ باڵاكانمان بێت و عه‌داله‌تی كۆمه‌ڵایه‌تی و مافی ھاووڵاتی بوون ده‌چه‌سپێنین و حكومه‌تی ھاوڵاتیش داده‌مه‌زرێنین.

بۆ كه‌ركوك و ناوچه‌ دابڕێندراوه‌كانیش سورتر ده‌بین له‌سه‌ر خه‌باتمان و كه‌ركوك به‌شێكی گرنگی جه‌سته‌ی یه‌كێتیی ده‌بێت و ھه‌ر به‌ قودسی كوردستانیش ده‌یھێڵینه‌وه‌.

درود بۆ گیانی پاكی  شه‌ھیدان
سه‌ربه‌رزی بۆ گه‌له‌كه‌مان
ھه‌ر شادو سه‌ركه‌وتووبن

براتان بافڵ تاڵه‌بانی

PUKmedia تایبه‌ت