پەروەردە بۆ رۆژانی پشوو خوێندكاران ئاگاداردەكاتەوە

.

وەزارەتی پەروەردە لەسەر پشووەكەی جەژن خوێندكارانی 12ی ئامادەیی ئاگادار دەكاتەوەو رایدەكەیەنێت: پشووەكەی یەكشەمە خوێندكاران ناگرێتەوەو تاقیكردنەوەی ئەو رۆژە كە زمانی عەرەبی و پەروەردەی ئیسلامییە لەكاتی خۆیدا بەڕێوەدەچێت. 

كەریم لەتیف بەڕێوەبەری گشتی ئەزمونەكان لەوەزارەتی پەروەردەی حكومەتی هەرێم لەبارەی رۆژانی پشووی پێش جەژن و ئەنجامدانی تاقیكردنەوەی قۆناغی 12ی ئامادەیی، لەڕوونكردنەوەیەكدا كە وێنەیەكی دەست PUKmedia كەوتووە، دەڵێت: ئاماژە بە بەیاننامەی وتەبێژی حكومەتی هەرێمی كوردستان لەبارەی راگەیاندنی رۆژەكانی پشووی جەژنی رەمەزان، خوێندكارانی قۆناغی 12ی ئامادەیی ئاگادار دەكەینەوە كە تاقیكردنەوەی بابەتی زمانی عەرەبی و پەروەردەی ئیسلامی كە دەكەوێتە رۆژی یەكشەممە 2ی حوزەیرانی 2019 لەكاتی خۆیدا ئەنجامدەدرێت و دواناخرێت و تەنها ئەم رۆژە لەپووشی جەژنی رەمەزاندا لەلایەن وەزارەتی پەروەردەوە بەپشوو هەژمار ناكرێت.

رونیشیكردوەتەوە: خشتەی گشتێنراوی بەڕێوەبەرایەتییەكەمان تایبەت بەتاقیكردنەوەكانی وەزاری وەك خۆی جێبەجێ دەكرێت بۆ ساڵی خوێندنی 2018- 2019 خولی یەكەم.

 ئەمڕۆ سەفین دزەیی وتەبێژی حكومەتی هەرێمی كوردستان رایگەیاند: لەڕۆژی 2-6 هەتا 9-6 لە هەرێمی كوردستان بەبۆنەی جەژنی پیرۆزی ڕەمەزانەوە پشوو دەبێت و بۆ تاقیكردنەوەكانیش وەزارەتەكانی پەروەردەو خوێندنی باڵا خۆیان بڕیار دەدەن. 

PUKmedia تایبەت