گه‌رمیان ..داوای گه‌ڕانه‌وه‌ی پزیشكه‌كان ده‌كرێت بۆ سه‌ر كاره‌كانیان

.

یه‌كشه‌ممه‌ 26ی ئایاری 2019به‌سه‌رپه‌رشتی سه‌ڵاح كوێخا سه‌رپه‌رشتیاری ئیداره‌ی گه‌رمیان و نوینه‌ری داواكاری گشتی و قائیمقامی قه‌زای كه‌لار و به‌ڕێوه‌به‌ری گشتی ته‌ندروستی گه‌رمیان كۆبونه‌وه‌یه‌ك له‌دیوانی ئیداره‌ی گه‌رمیان به‌ڕێوه‌چوو

كۆبونه‌وه‌كه‌ به‌مه‌به‌ستی تاوتوێكردنی پرسی مانگرتنی پزیشكه‌كانی سنوره‌كه‌ رێكخرابوو ، سه‌ڵاح كوێخا سه‌رپه‌رشتیاری ئیداره‌ی گه‌رمیان ڕایگه‌یاند:" پێویسته‌ ئه‌و پزیشكانه‌ی مانیانگرتووه‌و كاره‌كانی خۆیانیان جێهێشتووه‌ ده‌ست له‌مانگرتن هه‌ڵبگرن و بڕۆنه‌وه‌ شوێنی كاره‌كانیان له‌به‌رئه‌وه‌ی ژیانی هاووڵاتیان له‌پێش هه‌رشتێكی تره‌وه‌یه‌و ناكریت نه‌خۆشخانه‌و بنكه‌ ته‌ندروستی یه‌كان له‌ژێر هیچ پاساوێكدا دابخرێن یاخود دكتۆرێك نه‌بێت نه‌خۆشیان تێدا ببینێت".

سه‌رپه‌رشتیاری ئیداره‌ی گه‌رمیان ووتیشی:" له‌مڕۆ به‌دواوه‌ به‌شێوه‌یه‌كی دیكه‌ مامه‌ڵه‌ له‌گه‌ڵ ئه‌م بابه‌ته‌ده‌كرێت و ئه‌گه‌ر ئه‌و مانگرتنه‌ كۆتایی پێنه‌هێنرێت و هه‌ر حاڵه‌تێكی نه‌خوازراوی ته‌ندروستی له‌ سنوری هه‌ر نه‌خۆشخانه‌و بنكه‌یه‌كی ته‌ندروستیدا ڕوبدات به‌رپرسیارێتی ئیداری و یاسایی ئه‌كه‌وێته‌ ئه‌ستۆی پزیشكه‌كانی ئه‌و ناوه‌نده‌ ته‌ندروستی یانه‌".

هاوكات به‌ڕێوه‌به‌ری ته‌ندروستی گه‌رمیانیشی ڕاسپارد هه‌ر ئه‌مڕۆ كۆبونه‌وه‌یه‌كی فراوان له‌گه‌ڵ ئه‌و پزیشكانه‌ ئه‌نجام بدات كه‌ مانیان گرتووه‌و ڕێوشوێنه‌ ئیداری و یاساییه‌كانیان بۆ ڕوون بكاته‌وه‌.

PUKmedia تایبه‌ت