ئه‌ڵمانیا.. دادگاییكردنی پۆلیسی شه‌ریعه‌ت ده‌ستپێده‌كاته‌وه‌

.

دیارده‌ی پۆلیسی شه‌ریعه‌ ده‌ستووری ئه‌ڵمانیای هێنایه‌ ده‌نگ و جارێكیتر ئه‌و پرسه‌ كه‌وته‌وه‌ به‌ر هه‌ڵمه‌تی راگه‌یاندنه‌كانی ئه‌ڵمانیا و تۆمه‌تبارانیش تۆمه‌ته‌كانیان ره‌ت ده‌كه‌نه‌وه‌.

دوای پێنج ساڵ له‌سه‌رهه‌ڵدانی دیارده‌ی پۆلیسی شه‌ریعه‌ له‌هه‌رێمی نۆرد راین ڤێستڤاڵنی ئه‌ڵمانیا رۆژی 20 ئایاری 2019 جارێكیتر دانیشتنی دادگاییكردنی حه‌وت تۆمه‌تبار له‌و گروپه‌ له‌شاری ڤوبه‌رتاڵ ده‌ستیپێكرده‌وه‌.

ئه‌م گروپه‌ به‌ر له‌پێنج ساڵ و به‌دیاریكراوی له‌  ئه‌یلولی 2014 به‌هێله‌كی زه‌رده‌وه‌ وه‌ك هۆشداریه‌ك بۆ هه‌ڵسوكه‌وتی خه‌ڵكی  به‌تایبه‌تی به‌مه‌به‌ستی رێگه‌گرتن له‌موسولمَانه‌ گه‌نجه‌كان تا نه‌چنه‌ شوێنه‌كانی تێكه‌ڵبوون و پشودان و حه‌وانه‌وه‌و شوێنی خواردنه‌وه‌ و  رابواردن و یاریكردن.

ئه‌و كه‌سانه‌ هێله‌كی زه‌ردیان له‌به‌ر كردبوو له‌سه‌ری نوسرابوو "پۆلیسی شه‌ریعه‌ت"ی ئیسلامی به‌شه‌قام و ناوچه‌كانی ئه‌و هه‌رێمه‌دا بڵاوببونه‌وه‌ به‌تایبه‌تی شاری ڤوبه‌رتاڵی هه‌رێمه‌كه‌یان توشی شۆك كردو هه‌رایه‌كی گه‌وره‌یان له‌سه‌ر ئاستی ئه‌ڵمانیا نایه‌وه‌ و بووه‌ جێی سه‌رنجی میدیاكانی ئه‌ڵمانیا.
هاوكات له‌گه‌ڵ ده‌ستپێكردنه‌وه‌ی دادگاییكردنه‌كه‌یاندا ئه‌و تۆمه‌تبارانه‌ هه‌موو ئه‌و تۆمه‌تانه‌یان ره‌تكرده‌وه‌ كه‌ڕوو به‌ڕویان كرابوه‌وه‌ و ئاماده‌ نه‌بوون هیچ لێدوانێك بده‌ن.

شایه‌نی باسه‌ له‌ده‌ستپێكی یه‌كه‌مین دادگاییكردنیاندا له‌ 2016 دا دادگا به‌رامبه‌ر به‌و تۆمه‌تانه‌ی كه‌ڕوبه‌ڕویان كرابوه‌وه‌ به‌تایبه‌تی له‌پۆشینی هێله‌كی پۆلیسی شه‌ریعه‌ به‌بیانووی ئه‌وه‌ی  ئه‌وه‌ی ئه‌و هێله‌كانه‌ جلی فه‌رمی نیه‌و كاریگه‌ری نیه‌  بێتاوانیانی راگه‌یاندن، به‌ڵام دادگای فیدرالی ئه‌و بڕیاره‌ی یه‌كه‌مین دادگاییكردنیانی له‌مانگی تشرینی یه‌كه‌می ساڵی رابردوودا هه‌ڵوه‌شانده‌و دوای چوار دانیشتنی پیاچونه‌وه‌ به‌تۆمه‌تی تاوان وكاریگه‌ری له‌سه‌ر داب و نه‌ریتی خه‌ڵكی و سنورداركردنی ئازادیه‌كان كه‌دژی ده‌ستوری ئه‌ڵمانیه‌ بێ تاوانیان ڕه‌تكرایه‌وه‌و له‌به‌رامبه‌ر تۆمه‌ته‌كانیشدا داواكاری گشتی داوای زیندانی  دوو ساڵی به‌لای كه‌مه‌وه‌ بۆ هه‌ریه‌كێكیان كردوه‌.

PUKmedia شیهاب عوسمان- ئه‌ڵمانیا

س/ ئاژانسی هه‌وڵی ئه‌ڵمانی