قوباد تاڵەبانی:مامۆستایان لەخەباتدا وەك پێشمەرگە رۆڵیان بینیوە

.

قوباد تاڵەبانی جێگری سەرۆك وەزیرانی هەرێمی كوردستان بەبۆنەی یادی  57یەمین ساڵەی دامەرزاندنی یەكێتی مامۆستایانەوە پیرۆزبایی لەیەكێتییەكە دەكات و دەڵێت: یەكێتی مامۆستایان یەكێك لەچالاكترین و پێویستترین رێكخراوە مەدەنییەكانی كوردستانەو  لەڕۆژگاری خەباتی رزگاریخوازیدا وەك پێشمەرگە چالاكانەو لەخۆ بردوانە رۆڵیان دیوە.

بەڕێزان سەرۆك و ئەندامانی سكرتاریەتی یەكێتی مامۆستایانی كوردستان

 (57) ەمینی ساڵیادی دامەزراندنی یەكێتی مامۆستایان پیرۆز دەكەم و كارو بەرهەمی ئەم رێكخراوە پێشەنگە لەمەیدانەكانی خەباتی نەتەوەیی و پەروەردەو زانست بەرز دەنرخێنم. 

یەكێتی مامۆستایان یەكێك لەچالاكترین و پێویستترین رێكخراوە مەدەنییەكانی كوردستانە بەوپێیەی زادەو هەڵقوڵاوی خەباتی پیشەیی توێژی مامۆستایان و گرنگیدانە بەڕێكخستنی كاروباری رێبەرانی فێركردن و وانەبێژانی نەوەكانی داهاتوو كە ئایندەو سەرمایەی راستەقینەی گەلی كوردستانن. 

ئێوە لەرۆژگاری خەباتی ڕزگاریخوازیدا وەك پێشمەرگە چالاكانەو لەخۆ بردووانە ڕۆڵتان دیوە، لەپاش ڕاپەڕینیش لە گۆڕانكارییە پەروەردەییەكان و پەرەسەندنەكانی فێركردن هاوكارو یارمەتیدەرو بەشداری چالاك بوون لە شانازی بەردەوامی خوێندن و فێركردنی كوردستان لە وێستگە جیاجیاكانی گەمارۆی ئابووری و قەیران و جەنگەكانیش پشكی شێرتان بەردەكەوێت.

لەرێی بەرێزتانەوە سڵاو بۆ سەرجەم مامۆستایانی كوردستان دەنێرم كە لێبڕاوانە لەهۆڵەكانی خوێندندا نەوەی ئایندەی كوردستان فێری بەهای جوان و پەروەردەی باش و زانست و زانیاری دەكەن و هەرچی بۆ ئەوان بكرێت هێشتا هەر كەمە.

دووبارە پیرۆزبایی ساڵیادی دامەزراندنی یەكێتی مامۆستایان دەكەم كە ئێمە وەك داكۆكیكارو بەرگریكاری مامۆستایان ناسیومانەو لەم بۆنەیەشدا هیوای نوێبونەوەو پەرەسەندن و كارو پلان و بەرنامەی نوێ و دڵخۆشكەری بۆ دەخوازم.. 

هەر شادو سەربەرزو سەركەوتووبن

قوباد تاڵەبانی

جێگری سەرۆك وەزیران

PUKmedia