سه‌رۆك كۆمار پشتیوانی خۆی بۆ پێكهاته‌ جیاوازه‌كان دووپاتده‌كاته‌وه‌

.

د. به‌رھه‌م ساڵح سه‌رۆك كۆماری عیراق ئه‌مڕۆ 14-5-2019، له‌ كۆشكی سه‌لام له‌ به‌غدا چاویكه‌وت به‌ مه‌تران ئاڤاك ئه‌سادۆریان سه‌رۆكی تایه‌فه‌ی ئه‌رمه‌نی ئه‌رته‌دۆكس له‌ عیراق و وه‌فدی یاوه‌ری.

له‌ دیداره‌كه‌دا سه‌رۆك به‌رھه‌م ساڵح ئاماژه‌ی به‌وه‌كرد كه‌ ئه‌رمن پێكھاته‌یه‌كی ره‌سه‌نی كۆمه‌ڵگه‌ی عیراقن و پابه‌ندبوونی پێكھاته‌ی ئه‌رمه‌نیشی به‌ شوناسی نیشتمانی و پێكه‌وه‌ژیانی ئاشتیانه‌ له‌گه‌ڵ پێكھاته‌كانی دیكه‌دا به‌رزنرخاند، ھاوكات ئاماده‌یی خۆشی نیشاندا بۆ پشتیوانیكردنی داوا ره‌واكانیان له‌ ده‌سته‌به‌ركردنی گوزه‌رانێكی باشتر له‌گه‌ڵ سه‌رجه‌م گه‌لانی عیراقدا.

له‌لای خۆیه‌وه‌ مه‌تران ئه‌سادۆریان رێزو پێزانینی خۆی  بۆ ھه‌وڵه‌كانی سه‌رۆك كۆمار له‌پێناوی نزیككردنه‌وه‌ی دیدو بۆچوونه‌كانی گشت پێكھاته‌كانی گه‌لی عیراق و به‌ھێزكردنی گیانی لێكگه‌یشتنی نیشتمانی ده‌ربڕی.

ھه‌ر له‌ میانی دیداره‌كه‌دا باس له‌ پێویستی گرنگیدانی زیاتر به‌ به‌شداریكردنی پێكھاته‌ی ئه‌رمه‌ن له‌ داموده‌زگاكانی حكومه‌ت و یاسادانان كرا.

PUKmedia