10 رۆژ بۆ پێشكه‌شكردنی راپۆرت و پێشنیاره‌كان دیاریكرا

.

قوباد تاڵه‌بانی له‌گه‌ڵ لیژنه‌ی شه‌قامی 100مه‌تری سلێمانی، واده‌ی 10 رۆژیان دیاریی كرد.

به‌ سه‌رپه‌رشتی قوباد تاڵه‌بانی جێگری سه‌رۆك وه‌زیرانی هه‌رێمی كوردستان، كۆبوونه‌وه‌ی تایبه‌ت به‌جێبه‌جێكردنی پرۆژه‌ی شه‌قامی 100 مه‌تری سلێمانی به‌ڕێوه‌چوو و تیایدا تاوتوێی چۆنیه‌تیی ده‌ستپێكردنی پڕۆژه‌كه‌ كراو واده‌ی 10 رۆژ بۆ پێشكه‌شكردنی راپۆرت و پێشنیاره‌كان دیاریكرا.

له‌ كۆبوونه‌وه‌كه‌دا كه‌ ئه‌مڕۆ سێشه‌ممه‌ 14 ئایاری 2019  له‌ سلێمانی به‌ڕێوه‌چوو و وه‌زیرانی ئاوه‌دانكردنه‌وه‌ و نیشته‌جێكردن، شاره‌وانی و گه‌شتوگوزار، له‌گه‌ڵ پارێزگاری سلێمانی و بریكاری وه‌زیری شاره‌وانی وسه‌رۆكی شاره‌وانی سلێمانی و ئه‌ندامانی لیژنه‌ی سه‌رپه‌رشتیاری جێبه‌جێكردنی پڕۆژه‌ی شه‌قامی 100 مه‌تری سلێمانی ئاماده‌یبوون، بڕیاردرا لیژنه‌ی سه‌رپه‌رشتیاری جێبه‌جێكردنی پڕۆژه‌كه‌ له‌ ماوه‌ی 10 رۆژی كاریدا له‌ راپۆرتێكدا پێشنیار و راسپارده‌كانی خۆی سه‌باره‌ت به‌ چۆنیه‌تیی ده‌ستپێكردنی پڕۆژه‌كه‌  پێشكه‌شی وه‌زاره‌تی شاره‌وانی و سه‌رۆكایه‌تیی ئه‌نجومه‌نی وه‌زیران بكات، بۆ ئه‌وه‌ی به‌ زووترین كات بڕیار له‌چۆنیه‌تی ده‌ستپێكردنی بدرێت.

ئه‌م كۆبوونه‌وه‌یه‌ دوای ئه‌و هات كه‌له‌ كۆبوونه‌وه‌ی هه‌فته‌ی رابردووی قوباد تاڵه‌بانی له‌گه‌ڵ وه‌زیره‌ په‌یوه‌ندیداره‌كان و پارێزگاره‌كانی هه‌ر چوار پارێزگاكه‌ی هه‌رێم سه‌باره‌ت به‌ چاككردنه‌وه‌ی ڕێگاوبانه‌كان، بڕیاردرا كۆبوونه‌وه‌یه‌كی تایبه‌ت به‌جێبه‌جێكردنی پڕۆژه‌ی شه‌قامی 100 مه‌تری سلێمانی ئه‌نجامبدرێت بۆ ئه‌وه‌ی بخرێته‌ بواری جێبه‌جێكردنه‌وه‌.

PUKmedia تایبه‌ت