قوباد تاڵه‌بانی: هه‌وڵی ره‌خساندنی هه‌لی كار ده‌ده‌ین

.

جێگری سه‌رۆكی حكومه‌تی هه‌رێمی كوردستان به‌شداری له‌ئاهه‌نگی ده‌رچوونی هه‌شته‌مین خولی زانكۆی ئه‌مریكی له‌سلێمانی كردو وتی، له‌كابینه‌ی داهاتوودا هه‌وڵی ته‌واو ده‌ده‌ین بۆ ئه‌وه‌ی زۆرترین هه‌لی كار بۆ گه‌نجان بڕه‌خسێنین.

قوباد تاڵه‌بانی جێگری سه‌رۆك وه‌زیرانی هه‌رێمی كوردستان هانی ده‌رچووانی ئه‌مساڵی زانكۆی ئه‌مریكی له‌ سلێمانی دا كه‌ به‌ پرۆژه‌ و شاره‌زاییه‌كانیان به‌شداربن له‌بووژاندنه‌وه‌ی ژێرخانی ئابووریی هه‌رێمی كوردستان و پاڵپشتیی ته‌واوی خۆیشی بۆ هاوسه‌نگیی جێنده‌ری له‌ بازاڕی كار راگه‌یاند.

له‌ میانه‌ی وتارێكدا كه‌له‌ ده‌سپێكی ئاهه‌نگی هه‌شته‌مین خولی ده‌رچووانی زانكۆی ئه‌مه‌ریكی له‌ سلێمانی ئێواره‌ی ئه‌مرۆ 13 ئایاری 2019 پێشكه‌شی كرد، به‌ڕێز قوباد تاڵه‌بانی وێڕای پیرۆزبایی له‌ ده‌رچووان، جه‌ختی كرده‌وه‌ كه‌ توانای مرۆیی شاره‌زا، گه‌وره‌ترین سه‌رمایه‌ی هه‌ر وڵاتێكن و له‌مباره‌یه‌وه‌ ژاپۆن و ئه‌ڵمانیای پاش جه‌نگی جیهانی دووه‌می به‌ نمونه‌ هێنایه‌وه‌ كه‌ ته‌نیا به‌ پشت به‌ستن به‌ هێزی كاری شاره‌زا و زانكۆی به‌هێز توانیان له‌ ماوه‌یه‌كی كورتدا هه‌ستنه‌وه‌ و ئابوورییه‌كی به‌هێز بنیات بنێن.
له‌ به‌شێكی دیكه‌ی وتاره‌كه‌یدا قوباد تاڵه‌بانی ستایشی به‌ره‌وپێشچوونی ئاستی زانكۆكانی هه‌رێمی كوردستانی كرد له‌ناویاندا زانكۆی ئه‌مه‌ریكی و ڕوونیكرده‌وه‌ ته‌نها به‌ده‌ستهێنانی بڕوانامه‌ به‌س نییه‌ بۆ فێرخوازان، به‌ڵكو ده‌بێت پێشه‌نگ بوون له‌ پێشخستنی كه‌رتی كار و پێشكه‌شكردنی بیرۆكه‌ و پرۆژه‌ی تایبه‌ت كه‌ پێویستی قۆناغی ئێستایه‌ به‌ تایبه‌ت  له‌ بواره‌كانی كشتوكاڵ و گه‌شتوگوزار و پیشه‌سازیدا.

قوباد تاڵه‌بانی دووپاتیشی كرده‌وه‌، كه‌ ده‌بێت هه‌رێمی كوردستان فه‌لسه‌فه‌ و ڕێبازێكی ئابووریی دیاریكراو و گونجاو هه‌ڵبژێرێت، گه‌شبینیی خۆیشی پیشاندا كابینه‌ی داهاتوو په‌ره‌ به‌ چاكسازییه‌كان و ئاستی خزمه‌تگوزاریه‌كان بدات و گرنگیی زیاتر بدات به‌ جوڵاندنی بازاڕ و وتی كه‌ هه‌موو هه‌وڵ و توانایان بۆ ئه‌وه‌ ده‌بێت به‌ په‌ره‌پێدانی كه‌رتی تایبه‌ت زۆرترین هه‌لی كار بۆ گه‌نجان و به‌تایبه‌ت بۆ ده‌رچووانی زانكۆ بڕه‌خسێنن.

له‌ كۆتایی وته‌كه‌یدا جێگری سه‌رۆك وه‌زیران وتاره‌كه‌ی ته‌رخانكرد بۆ پشتیوانیكردنی كاری ژنان و دابه‌زینی ژنان بۆ بازاڕی كار و خاوه‌ندارێتیی پرۆژه‌ی تایبه‌تی خۆیان و دوای كرد ژنانی خاوه‌ن بڕوانامه‌ به‌ ئیراده‌یه‌كی به‌هێزه‌وه‌ هه‌موو ئه‌و به‌ربه‌ستانه‌ تێكبشكێنن كه‌ ڕێگره‌ له‌ كاری ژنان و كۆمه‌ڵگای له‌م توانا مرۆییه‌ مه‌زنه‌ بێبه‌ش كردووه‌ و له‌مباره‌یه‌شه‌وه‌ پاڵپشتیی ته‌واوی خۆی بۆ ژنان نیشاندا.

PUKmedia تایبه‌ت