له‌ بڵاوبوونه‌وه‌ی په‌تایه‌ك هۆشداریی ده‌درێته‌ هاووڵاتییان

.

په‌تایه‌كی وه‌رزی له‌ناو هاووڵاتییاندا بڵاوده‌بێته‌وه‌ و وته‌بێژی به‌ڕێوه‌به‌رایه‌تی ته‌ندروستی سلێمانیش رایده‌گه‌یه‌نێت، به‌هۆی گۆڕانكارییه‌ خێراكانی كه‌شوهه‌واوه‌ بڵاوده‌بێته‌وه‌ و له‌ ئێستاشدا بۆ رووبه‌روو بوونه‌وه‌ی په‌تاكه‌ هه‌موو ئاماده‌كارییه‌كمان كردووه‌.

له‌وباره‌یه‌وه‌ دكتۆر یاد نه‌قشبه‌ندی وته‌بێژی به‌ڕێوه‌به‌رایه‌تی ته‌ندروستی سلێمانی به‌ PUKmedia ی راگه‌یاند: په‌تای وه‌رزی، جۆره‌ نه‌خۆشییه‌كی چاوه‌ڕاوانكراوه‌ و له‌گه‌لًَ گۆڕانی كه‌شوهه‌وادا ئه‌م جۆره‌ نه‌خۆشییانه‌ سه‌رهه‌ڵده‌ده‌ن و له‌ چوار وه‌رزی ساڵدا بوونییان هه‌یه‌، گۆڕانكارییه‌ خێراكانی كه‌شوهه‌واش هۆكاری سه‌ره‌كین بۆ دروستبوونی ئه‌و جۆره‌ په‌تایانه‌.

وتیشی: له‌ ئێستادا به‌ڕێوه‌به‌رایه‌تی ته‌ندروستی سلێمانی هه‌موو ئاماده‌كارییه‌كی له‌ بنكه‌ ته‌ندروستییه‌كان له‌ڕووی ده‌رمان و كه‌لوپه‌لی پێویست و ئامێره‌وه‌ كردووه‌ و  هۆشیاریی به‌رده‌وامیش ده‌درێته‌ هاووڵاتییان بۆئه‌وه‌ی خۆیان له‌و جۆره‌ په‌تایانه‌ بپارێزن.

راشیگه‌یاند نیشانه‌كانی بریتین له‌: كۆكه‌ و خورانی قوڕگ و كۆكه‌ی شه‌وان و له‌رزو تایه‌كی سوك.

دكتۆر یاد نه‌قشبه‌ندی جه‌ختیشیكرده‌وه‌، ئه‌و په‌تای وه‌رزییه‌ مه‌ترسی نییه‌، به‌ڵام دوای ده‌ركه‌وتنی نیشانه‌كانی پێویسته‌ كه‌سی توشبوو سه‌ردانی بنكه‌ ته‌ندروستییه‌كان بكات به‌ مه‌به‌ستی وه‌رگرتنی چاره‌سه‌ر، زۆرجاریش ته‌نها پێویستیان به‌ڕێنمایی پزیشكییه‌، به‌ڵام ئه‌گه‌ر له‌چوار رۆژ زیاتر نیشانه‌كان به‌رده‌وام بوون، كه‌سه‌كه‌ ده‌توانێت ده‌رمانی پێویست وه‌ربگرێت.

PUKmedia ژینه‌ر محه‌مه‌د