خاتوو شاناز بەشداری ساڵیادی بۆردومانی قەڵادزێ دەکات

.

ئەمڕۆ 24 ی نیسانی 2019 بە ئامادەبوونى خاتوو ( شاناز ئیبراهیم ئەحمەد ) لێپرسراوى ناوەندى دەرەوەى ( ی . ن . ک ) و کەس و کاری سەربەرزی شەھیدان و لێپرسراوانی حزبی و حکومى و جەماوەرێکی بەرفراوانی سنورەکە بەدروشمی ( قەڵادزێ چرایەك بو زانست و هیوایەك بۆ نیشتمان ) لەشاری قەڵادزێ لەسەر گڵکۆی شەهیدان مەڕاسیمی یادی بۆردوومان کردنی شاری قەڵادزێ و ڕۆژی شەهیدی زانکۆ و خۆپێشاندانی خەڵکی قەڵادزێ بەڕێوەچوو.

سەرەتای مەراسیمەكە بەساتێك رێزگرتن بۆگیانی پاكی شەهیدان و خوێندنەوەی چەند ئایەتێك لە قورئانی پیرۆز دەستپێكرد ، پاشان چەند وتارێك پێشكەشكران، لەوتارەكاندا بیرەوەرییەكانی كارەسات و راپەڕینی شارەكە باسكران، هەروەك باس لەڕۆڵی قارمانانەی خەڵكی سنورەكە لەڕوبەڕوبونەوەی رژێمە فاشیستەكان و دوژمنانی گەلی كورد كرا، لەبەشێكی دیكەی وتارەكاندا جەختی لەپێویستی زیاتری ئاوەدانكردنەوەی شارەكە كرا.

پاشان چەند چالاكیەكی جۆراوجۆر تایبەت بەكارەسات و راپەڕینەكە پێشكەش بەئامادەبووان كرا ، دواتر تاجە گوڵینەی خاتوو شاناز ئیبراهیم ئەحمەد و لێپرسراوانی حزبی و حکومی لەسەر مەزاری شەهیدان دانرا.

هەرلەمیانەی مەڕاسیمی ساڵڕۆژی كارەسات و ڕاپەڕینی ( 24-4 ) لە پەیمانگای قەڵادزێی ناحكومی بۆ زانستەكانی كۆمپیوتەر خاتوو شاناز ئیبراهیم ئەحمەد بەشداریكرد لە چوارەمین فێستیڤاڵی كلتوری و زانستی كه‌ ژماره‌یه‌ك كاری ده‌ستی و چالاكی هونه‌ری و وەرزشی و لاواندنەوەو نمایشی خوێندكارانی له‌ خۆگرتبوو كە گوزارشتیان دەكرد لە بۆردوومان کردنی شاری قەڵادزێ و ڕۆژی شەهیدی زانکۆ و خۆپێشاندانی خەڵکی قەڵادزێ.

لەمیانەی بەسەركردنەوەی پرۆژە و بەرهەمەكانی خوێندكارەكاندا، خاتوو شاناز ئیبراهیم ئەحمەد وێڕای دەربڕینی هاوخەمی بۆ ئەو كارەساتە گەورەیەی كە بەسەر شارەكە هاتووە، لەنزیكەوە گفتوگۆی لەگەڵ مامۆستایان و خوێندكارەكان كرد و ستایشی كارەكانیانی كرد.

بۆردوومانکردنی کردنی شاری قەڵادزێ رۆژی 24ی نیسانی ساڵی 1974 کاتژمێر 9:40 خولەکی سەر لەبەیانی، شەش فڕۆکەی جۆری سیخۆی دروستکراوی دەستی یەکێتی سۆڤیەت، بە بۆمبمی ناپاڵمی دروستکراوی دەستی هندستان، شاری قەڵادزێ بۆردومان دەکەن و لە ئەنجامیشدا 161 کەس گیانیان لە دەستداو دەیان کەسی تریش بریندار و کەمئەندام بون.

هەر لەمیانەی سەردانەكەی بۆ شارۆچكەی قەڵادزێ خاتوو ( شاناز ئیبراهیم ئەحمەد ) سەردانی كۆمیتەی ڕێكخستنی پشدەریكرد ، وێڕای پێشوازیكردنی هەڤاڵانە ، هەڤاڵ ( رسوڵ سۆفی ) لێپرسراوی كۆمیتەی ڕێكخستنی پشدەر ، خۆشحاڵی خۆی دەربڕی بۆ لێپرسینەوەو بەسەركردنەوەكانی خاتوو شاناز و ڕایگەیاند : لەماوەی ڕابردوو ئێستاش ( خاتوو شاناز ) بێ جیاوازی پشتوو پشتیوانی ڕێكخستنەكانی یەكێتی بووە لەسەرجەم سنورەكانداو هەر ئەو خەمخۆریەش وایكردووە كە داكۆكیكارێكی سەرسەختی پاراستنی ڕێبازەكەی مام بێت ، دواتر خاتوو شاناز ئیبراهیم ئەحمەد لە ووتەیەكدا لە بەردەم كادران و هەڤاڵانی كۆمیتەی ڕێكخستنی پشدەر وێڕای بەرزنرخاندنی قوربانیدان و ئازارو نەهامەتیەكانی سنورەكە ستایش هەڵوێست و جوامێری خەڵكی سنوری پشدەریكرد ووتی ئەو ئازادیەیی لە كوردستان هاتووتە دی بەرهەمی قوربانیدانی كەس و كاری ئێوەو خوێنی شەهیدانی سەربەرزی نیشتمانەكەمانە بۆیە هەرچیەكمان لەدەست بێت درێغی ناكەین.

PUKmedia تایبەت