بافڵ تاڵەبانی: لە قۆناغەكانی كۆتایی پێكهێنانی حكومەتداین

.

بافڵ تاڵەبانی لە دەباشان چاویكەوت بە باڵیۆز ولیام رویبوك جێگری نێردەی تایبەتی سەرۆكی ئەمریكا بۆ هاوپەیمانێتی نێودەوڵەتی دژی داعش و ستیفن فەیگن كونسوڵی گشتی ئەمریكا لە هەرێمی كوردستان، لەدانیشتنێكدا بیروڕا ئاڵوگۆڕكرا لەبارەی پێشهات و پەرەسەندنە سیاسییەكان هەرێم و عیراق و ناوچەكە.

لەبەر رۆشنایی سیاسەتی بڕیارلێدراوی یەكێتیی نیشتمانیی كوردستان بافڵ تاڵەبانی باری سەرنجی لەسەر بارودۆخی سیاسی و سەربازی و ئابوری هەرێم خستەڕوو رایگەیاند: لە قۆناغەكانی كۆتایی پێكهێنانی حكومەتی نوێی هەرێمین  و چاكسازی و خزمەتكردن و ئاوەدانی زیاتر لە ئەولەویەتی بەرنامەی حكومەتی داهاتوو دەبێت و هەموو هەوڵێكی یەكێتیش كاركردن دەبێت بۆ گۆڕانكاری ریشەیی لە بەڕێوبردن و ئیدارەدانی هەرێم.

سەبارەت بە قۆناغی نوێی رووبەڕوبونەوەی تیرۆریش بافڵ تاڵەبانی رونیكردەوە شەڕی داعش كۆتایی نەهاتووە پێویستە بەسیاسەت و ستراتیژێكی نوێوە پلان دابنێین بۆ جەنگی رووبەڕوبونەوەی تیرۆرستانی داعش و لەڕووی پەروەردەو فیكرەوە روبەڕووی بیری ترس و تۆقاندن و توندڕەوی ببینەوە بۆ ئەوەش پێویستمان بەهاوكاری بەردەوامی هاوپەیمانان دەبێت.

پەیوەست بە پرۆسەی سیاسیش لە عیراق بافڵ تاڵەبانی هەڵوێستەی كرد لەسەر سیاسەتی نوێی عیراق و پەیوەندییەكان لەگەڵ بەغداو تەئكیدیكردەوە لەسەر چارەسەركردنی كۆی كێشەكان لەسەر بنەمای دەستوور و بەرژەوەندی هاوبەش. 

لەبەرامبەردا وەفدی میوان بە بایەخەوە لە رۆڵی هێزی پێشمەرگەیان روانی لەسەركەوتنی جەنگی رووبەڕوبوونەوەی داعش و سوپاسی یەكێتییشیان  كرد كە لەهاوكێشە سیاسییەكاندا رۆڵی باشی گێڕاوە.

PUKmedia