بەڤیدیۆ.. كەشناسی: بارانی بەلێزمەو هەورە بروسكە بەڕێوەیە

.

كەشناسی هەرێم رایگەیاند: بارستە هەورێكی چالاك رووی لەناوچەكانی هەرێم كردوەو لە هەولێرو دهۆك لێزمە باران و هەورە ترشقە دەستیپێكردوەو چەند سەعاتێكی تریش شەپۆلەكە دەگاتە سلێمانی و گەرمیان.

ئەژی چەتۆ حەسەن، لێپرسراوی راگەیاندنی بەڕێوەبەرایەتی گشتی كەشناسی و بوومەلەرزەزانی هەرێمی كوردستان لەگرتەیەكی ڤیدیۆیدا كە لەپەیجی فەیسبوكی   كەشناسی و بوومەلەرزەزانی هەرێم بڵاویكردوەتەوە، رایگەیاند: وەك پێشبینیكرا بوو لەچەند رۆژی داهاتوو باری كەشوهەوا لەناوچەكانی هەرێمی كوردستان بەشێوەیەكی نائارام دەمێنێتەوەو بەهۆیەوە بارانی بەلێزمە دەبارێت و هەورە بروسكەشی لەگەڵ دەبێت.  

وتیشی:لەئێوارەی ئەمڕۆوە 21ی نیسانی 2019، بارستە هەورێكی چالاك ئاسمانی ناوچەكانی هەرێمی داپۆشیوەو لە هەردوو پارێزگای هەولێرو دهۆك لێزمە باران و هەورە ترشقە دەستیپێكردوە پێشبینی دەكرێت پاش چەند سەعاتێكی تر شەپۆلەكە بگاتە پارێزگای سلێمانی و ناوچەی گەرمیان و ئەم ناجێگیرییەی كەشوهەواش پێشبینی دەكرێت تاكو رۆژی سێ شەمە بەردەوامی هەبێت.

لەبارەی پێشبینی كەشوهەوای ئەم مانگەو مانگی داهاتوو، دەڵێت: زۆر ئەستەمە بۆ ماوەیەكی درێژ پێبینی بكەین، بەڵام كاریگەری ئەو بارستە هەورانەی لەناوچەكەدان جێگای سەرسوڕمانییە كە درێژەی كێشاوە، لەكاتێكدا لەمانگی نیسانیدان و چەندینجار دووبارە بووەتەوەو بارانێكی زۆر باریوە.

PUKmedia تایبەت 

لینكی تایبەت بۆ بینینی ڤیدیۆیەكە