كەركوك...

.

كەركوكییەكانیش رۆژی خۆیان هەیە!

لاپەرەكانی مێژووی هەریەك لە حزبەكوردستانییەكان هەڵبدرێتەوەلە ڕووی خەباتی شۆرشگێریی و سیاسیی, پڕن لەداستان و نەبەردیی و خۆ و خوێنبەخشین , هەڵبەتە سێ لەسەرچواری كۆی ناوەرۆك و كرۆكی لاپەرەكانی مێژووی خەباتی حزبەكانی ئەم بەشەی كوردستانیش خۆی لە پرسی كەركوك دەبینێتەوە چ لە رووی رووداوە سیاسییەكان چ لەرووی رووداوە سەربازییەكان چونكە لە هزر و فیكری هەلسوێنەری شۆرشەكان بە پێشمەرگە خۆبەخشەكانیشەوە ئەوە یەكلایی ببۆوە كە لایەنی بەرامبەر كە بەمەبەست لێی حكومەتە یەكلەدوای یەكەكانی پێش و پاشی 2003ی عیراقە و بەوەی ئێستاشەوە , تەنیا و تەنیا كەركوك وەكو ناسنامە بخرێتە دەرەوەی بازنە و هاوشێوەی موسڵ زاراوەی عیراقی بچوكی بۆببرنەوە گوایە لەو شارە جگە لە كورد, عەرەب و توركمان و كلدو ئاشوری تیایدا دەژی .

لایەنی بەرامبەر بۆ بەدەستخستنی ئەو مەرامە بەرەیەكیان لە  شۆڤێنیی و تۆرانییەكان خستە گۆرەپانەكە, بێگومان سەركردایەتی كوردیش بۆ پۆچەڵكردن و سەرنەكەوتنی ئەو پیلانە وەك پرەنسیپێكی هەمیشەیی و نەگۆر لەو پرسەدا یەكهەڵوست بوون و خەبات و خوێنیان بۆ بەخشی  بۆ ئەوەی كەركوك بە فەرمیی بگەرێتەوە نێو نەخشەی كوردستان ئەگەر بەچەند قۆناغێكیش بێ ,  بەڵام لەدوای نەمانی كۆسپەكان و هاتنی كاتی دوورینەوەی  حاسلاتی ئەو هەموو قوربانیدان و مێژووە پڕ نەهامەتییە لە ماڵ وێرانیی و تەرحیل و تەهجیر و ئەنفال و ژەهربارانكردن.

كەركوك كرا بە قوربانیی ململانێی ناوخۆیی و ریسەكە لە خەلكی شاری كەركوك كرا بەخوری و جارێكی تر دۆخەكە گەرێنرایەوە  پێش ساڵی 2003 , بەرەی نەیاران ئەگەر بۆیان بلوایە و ئامادەشبوون هەموو جۆرە قوربانیەك بدەن بۆ دروستكردنی لەمپەر لەبەردەم كوردستانیی بوونی كەركوك , بەڵام هەمیشە لەدوورەوە تەماشاكار بوون و چاوەرێی  ململانیی ناوخۆیی حزبە كوردستانییەكان بوون بۆ ئەوەی بەخۆرایی و بگرە لەسەر قاپێكی زێرین خودی كورد ئەو هیوایەیان  بۆ زیندووبكاتەوە چونكە پێشتر بەهەمان سیاسەتی پەرتكەو زاڵبە توانیان جێبەجێكردنی  ماددەی 140 دوا بخەن و لەمردن نزیكی بكەنەوە , ئەمجارەش بەهەمان سیاسیەت لەدوورە تەماشاكاربوون هەر كوردیش بووحكومرانیی ئیدارەی ناوخۆیی شارەكەی بۆ عەرەبێك جێهێشتوە.

لایەنێك ئەگەر پێی وابێ گەورەیی و بەتوانایی و بەهێزیی خۆی لە دەستبادانی لایەنێكی ناوخۆیی دیكە  بەوە پیشان بدات كە سەركەتووبوو لە رێگرتن  لە دیاریكرنی كاندیدی لایەنێكی كوردی  بۆ پارێزگاری كەركوك ,   ئەوا خەلكی شارەكە لە كات و ساتی خۆیدا  وەڵامی دەبێت و باج و  سەبەبكار و خوڵقینەری دووبارەبوونەوەی نەهامەتیەكان بەو لایەنە دەدات چونكە وتراوە و دەڵێن قور بەسەر ئەو حزب و لایەنەی گەل لێی یاخی دەبێ كە گەلیش لە حزبێك یاخی بوو لە رۆژی خۆیدا و كە رۆژی هەڵبژاردنە وەڵامی دەبێت و دەیخاتە روو بەوەی  كی بەخاوەنی شارەكە دازانن و دەنگ بەكێ دەدەن بۆ پاراستنی سەرو ماڵیان.

مەریوان عەلی محەمەد