من ئه‌وه‌ نیم

.

من ئه‌وه‌ نیم

ئینسان هه‌رچه‌ند سه‌ربهێنێ و سه‌ر ببات، له‌و قه‌ناعه‌ته‌ زیاترى ده‌ست ناكه‌وێت كه‌ موشكیله‌ى حوكمداریى ئه‌م هه‌رێمه‌ باوانشێواوه‌ى ئێمه‌ هیچ عیلاقه‌ى به‌ ئه‌قڵ و ئابوورى و گه‌نده‌ڵى و خوانه‌خواسته‌ بێ پلانییه‌وه‌ نى یه‌. كول مافیل ئه‌مر ئه‌وه‌یه‌ زۆر جار مه‌فعول بیهى جێ به‌ فاعیل لێژ ئه‌كات. یه‌عنى مه‌سه‌له‌ن ئه‌و حیزبه‌ى كه‌ براوه‌ى ئینتیخاباته‌ ئه‌چێته‌ شوێنى حیزبى دۆڕاو و ئه‌ڵێ ئه‌گه‌ر خێرێكم پێ نه‌كه‌ن مه‌جبورم ببمه‌ موعاره‌زه‌یه‌كى موئه‌ده‌ب. هه‌ر له‌سه‌ر ئه‌م ئیقاعه‌ سه‌رنج بفه‌رموو له‌م خه‌به‌رانه‌ى خواره‌وه‌:
× سه‌ندیكاى نه‌خۆش و ده‌رده‌دارانى هه‌رێم له‌ به‌یاننامه‌یه‌كدا داوایان له‌ دكتۆره‌كان كرد نه‌ختێك سه‌روپێ و جگه‌ره‌ كه‌م بكه‌نه‌وه‌.
× جوتیارانى شارباژێڕ وێنه‌ى ئه‌و پیكابه‌ى پۆلیسى دارستانیان هاویشته‌ فه‌یسبوكه‌وه‌ كه‌ شه‌ش حه‌وت باره‌دارى تێ كرابوو.
× قوتابیان و خوێندكاران له‌ هه‌ڕه‌شه‌ نامه‌یه‌كدا رایانگه‌یاند ئه‌گه‌ر مامۆستاكان پابه‌ند نه‌بن به‌ ده‌وامه‌وه‌ ناچارن ده‌ره‌جه‌ى سلوكیان لێ بشكێنن.
× له‌ هه‌ڵمه‌تێكى نیشتمانیدا هاووڵاتییه‌كى زه‌عیفه‌ چاڵه‌كه‌ى به‌رده‌مى مودیریه‌تى شاره‌وانى پڕ كرده‌وه‌.
× شۆفێرانى كوردستان داوایان له‌ ده‌زگاى مرور كرد پابه‌ند بن به‌ رێنماییه‌كانى هاتوچۆوه‌ و ئه‌وه‌نده‌ مه‌شغوڵى هه‌قایه‌ت نه‌بن بۆ یه‌كتر.
× قسه‌كه‌رێك به‌ ناوى فه‌لافل فرۆشه‌كانه‌وه‌ وتى خوا رابه‌ردارى هه‌قى نى یه‌. كه‌ داواى ئیجازه‌مان كرد نه‌ختێك خۆتان ته‌سك بكه‌نه‌وه‌، وا به‌ ئاسانى مه‌مانده‌نێ.
× زستانى ماوه‌ به‌سه‌رچوو له‌ دیدارێكى ته‌له‌فزیۆنیدا وتى من ئه‌وه‌ نیم حه‌زم له‌ ده‌سه‌ڵات بێ و خۆم شه‌رمه‌زارى نێرگز و گوڵاڵه‌سووره‌ بكه‌م. به‌ڵام به‌هار خۆى بێ غیره‌ته‌ و نایه‌ت ده‌وروته‌سلیمم له‌گه‌ڵدا بكات.