د.به‌رهه‌م: عیراق خوازیاری په‌ره‌پێدانی په‌یوه‌ندییه‌كانێتی له‌گه‌ڵ ئه‌مریكا

.

د.به‌رھه‌م ساڵح سه‌رۆك كۆماری عیراق سه‌ر له‌ به‌یانی ئه‌مڕۆ 18-3-2019، له‌ شاری سلێمانی پێشوازیكرد له‌ جه‌میس جێفری نێرده‌ی تایبه‌تی سه‌رۆكی ئه‌مریكا بۆ شه‌ڕی دژ به‌ تیرۆرو وه‌فدی یاوه‌ری .

له‌ دیداره‌كدا باس له‌ دواین گۆڕانكاری سیاسی و ئه‌منی ناوچه‌كه‌و پێویستی به‌رقه‌راركردنی ئاشتی و ئارامی و كۆتایی هێنان به‌ گرژێیه‌كان دووپاتكرایه‌وه‌.

له‌ میانی دیداره‌كه‌دا سه‌رۆك به‌رھه‌م ساڵح ئاماژه‌ی به‌وه‌ كرد كه‌ عیراق خوازیاری به‌ھێزكردن و په‌ره‌پێدانی ئاستی په‌یوه‌ندییه‌كانێتی له‌گه‌ڵ ویلایه‌ته‌ یه‌كگرتووه‌كانی ئه‌مریكا له‌ بواره‌ جیاجیاكاندا به‌جۆرێك كه‌ خزمه‌ت به‌ به‌رژه‌وه‌ندی ھاوبه‌شه‌كانی ھه‌ردوو گه‌ل و وڵات بكات.

سه‌رۆك كۆمار پشتیوانی ویلایه‌ته‌ یه‌كگرتووه‌كانی بۆ عیراق له‌ جه‌نگی دژ به‌ تیرۆر به‌رز نرخاند، هاوكات ھاریكاری و به‌شداری ولایه‌ته‌ یه‌كگرتووه‌كانی بۆ دووباره‌ ئاوه‌دانكردنه‌وه‌ی ناوچه‌ زیان لێكه‌وتووه‌كانی به‌گرنگ وه‌سفكرد.

لای خۆیه‌وه‌ جه‌میس جێفری پشتیوانی وڵاته‌كه‌ی بۆ پرۆسه‌ی چه‌سپاندنی ئاسایش و ئارامی عیراق دووپات كرده‌وه‌، هاوكات به‌ بایه‌خه‌وه‌ باسی له‌و سه‌ركه‌وتنانه‌ كرد كه‌ عیراق به‌سه‌ر گروپی داعشی تیرۆرستیدا به‌ده‌ستیهێناوه‌، پابه‌ندبوونی وڵاته‌كه‌شی دووپاتكرده‌وه‌ له‌ پشتیوانیكردنی عیراق له‌ جه‌نگی دژ به‌ تیرۆر.

PUKmedia