پاش 31 ساڵ منداڵێكی دیكەی هه‌ڵه‌بجه‌ دۆزرایەوە

.

له‌پاش 31 ساڵ منداڵێكی دیكه‌ی ونبووی هه‌ڵه‌بجه‌ به‌خانه‌واده‌كه‌ی شادبوه‌وه‌و دوای گه‌ڕانه‌وه‌شی، یه‌كه‌م شوێن كه‌ خه‌لیل سه‌ردانی كرد گۆڕی باوكی بوو.
خه‌لیل له‌ساڵی 1988 دا له‌كاتی كیمیابارانی هه‌ڵه‌بجه‌دا ته‌مه‌نی 9 مانگ بووه‌و به‌هۆكارێكی نادیاری له‌ئێران له‌خانه‌واده‌كه‌ی ونبووه‌و دوای 31 ساڵیش جارێكی دیكه‌ خه‌لیل به‌خانه‌واده‌كه‌ی شادبوه‌وه‌.

دایكی خه‌لیل-یش  (مه‌لیحه‌ محه‌ممه‌د) ی به‌ هه‌ڵدانی گوڵ و دابه‌شكردنی شیرینی پێشوازی له‌خۆی و ئه‌و خێزانه‌ش كرد كه‌له‌ ئێران له‌ نۆ مانگییه‌وه‌ گه‌وره‌یان كردوه‌و ئێستا ته‌مه‌نی 31 ساڵانه‌، هه‌روه‌ها بۆ كه‌ناڵه‌كانی راگه‌یاند مه‌لیحه‌ محه‌ممه‌د وتی: هیوادارم خه‌لیل لای ئێمه‌ بمێنێته‌وه‌و نه‌چێته‌وه‌ بۆ ئێران.

دوای كیمیابارانكردنی ھه‌ڵه‌بجه‌ له‌ 16-3-1988، له‌ شاری كرماشان خه‌لیلی ته‌مه‌ن نۆ مانگ له‌خێزانه‌كه‌ی داده‌بڕێت و له‌لایه‌ن خێزانێكی ئێرانییه‌وه‌ ھه‌ڵده‌گیرێته‌وه‌ و به‌خێوده‌كرێت، خێزانه‌كه‌ ناوی ده‌نێن محه‌ممه‌د و له‌گه‌ڵ منداڵه‌ تاقانه‌كه‌ی خۆیادا گه‌وره‌ی ده‌كه‌ن.

خه‌لیل ساڵح، منداڵه‌ ونبووه‌كه‌ی هه‌ڵه‌بجه‌ رایگه‌یاند: "زۆر خۆشحاڵم كه‌ به‌خانه‌واده‌كه‌م شادبوومه‌ته‌وه‌و دادگا له‌داهاتوودا بڕیار له‌سه‌ر ژیانی من ده‌دات، ئێستا پێموایه‌ زۆر زووه‌ بۆ ئه‌وه‌ی بڕیارێكی به‌په‌له‌ بده‌م".

PUKmedia تایبه‌ت