شوان عه‌توف فیلمه‌ درێژه‌كه‌ی ته‌واوده‌كات

.

ده‌رهێنه‌رو ئه‌كته‌ری دیاری سینه‌مای كوردی شوان عه‌توف، به‌رهه‌مهێنانی فیلمه‌ درێژه‌كه‌ی ته‌واوكردو له‌ئێستادا ئاماده‌كاری ده‌كرێت بۆ نمایشكردنی له‌سینه‌ماكانی كوردستان و عيراق.

شوان عه‌توف ده‌رهێنه‌رو ئه‌كته‌ری دیاری سینه‌مای كوردی له‌باره‌ی فیلمه‌كه‌وه‌ وتی "فیلمی (په‌یكه‌ری دڵ) یه‌كه‌مین ئه‌زموونی به‌رهه‌مهێنانی فیلمی درێژی منه‌و به‌رهه‌می كۆمپانیای كام پرۆده‌كشن و میترۆنیۆم پڕۆده‌كشنه‌".

فیلمه‌كه‌ له‌سیناریۆ و ده‌رهێنانی شوان عه‌توف و چیرۆكی عه‌بدولغه‌فار عه‌بدوڵا و سیناریۆی لوقمان سوخه‌نده‌ره‌و شوان عه‌توف سیناریۆكه‌ی داڕشتۆته‌وه‌.

عه‌توف روونیده‌كاته‌وه‌ "فیلمه‌كه‌ یه‌كه‌مین فیلمی میوزیكه‌ڵی كوردییه‌ و فیلمێكی رۆمانسی كۆمیدییه‌".

وتیشی "قۆناغێكی نوێ ده‌بێت له‌مێژووی سینه‌مای كوردی، به‌هێز و تواناوه‌ كارمان بۆ به‌رهه‌مهێنانی ئه‌م فیلمه‌ كردووه‌".

شوان عه‌توف ئاماژه‌ به‌وه‌ ده‌كات "به‌رهه‌مهێنانی فیلمه‌كه‌ی ته‌واو بووه‌و له‌كۆتایی مانگی نیسان و سه‌ره‌تای مانگی ئایاری ئه‌مساڵ له‌سینه‌ماكانی كوردستان و عيراق نمایش ده‌كرێت و پاشان فیلمه‌كه‌ بۆ فێستیڤاڵه‌ نێوخۆیی و نێوده‌وڵه‌تییه‌كان ده‌نێردرێت".

PUKmedia راگه‌یاندنی به‌رهه‌مه‌كانی ده‌رهێنه‌رو ئه‌كته‌ر شوان عه‌توف