له‌باره‌ی (شار)ه‌وه‌

.

مولابه‌ساتی رووداوی رفاندنی پاره‌كه‌ی نه‌خۆشخانه‌ی شار هه‌رچییه‌ك بێت و هه‌ر چۆنێك بێت. ده‌بێ یه‌كێتیی نیشتمانیی كوردستان و زیمامدارانی ئومور له‌ ئیداره‌ی شاره‌كه‌ بیكه‌نه‌ وێستگه‌یه‌ك بۆ پێداچوونه‌وه‌ و هه‌ڵوه‌سته‌ كردن، بیكه‌نه‌ ده‌رفه‌ت و شۆكێك بۆ راگرتنی ئه‌و نه‌زیف و رۆچوونه‌ی ده‌خوازێت حوكمڕانی یه‌كێتییانه‌ و مۆدێلی ئیداره‌ی سلێمانییانه‌ بخاته‌ ژێر پرسیاره‌وه‌.

پێش هه‌موو شتێك ده‌بێ یه‌كێتی و ئیداره‌كه‌ی لێره‌ خۆی بڵێ؛ ئیتر به‌سه‌. له‌پاڵ ده‌ستگیركردن و سزادانی دز و تاوانبارانی رووداوه‌كه‌دا، بۆ هه‌مووانی نیشان بدات یاسا و ته‌گبیری سیاسی، كه‌فاله‌تی راگرتنی ئه‌مجۆره‌ كارانه‌ ده‌كات. خۆی و هاوپه‌یمانه‌كانی له‌ ئیداره‌ی سلێمانی به‌و نه‌فه‌سه‌ رێوشوێن دابنێن كه‌ مۆدێلی سلێمانی وه‌كو دیموكراسی و فره‌یی و ره‌نگاوڕه‌نگی ده‌ڤه‌ری سه‌وزه‌ڵانی ده‌ناسێنێ، رێگه‌ش نادات كه‌س وا وێنای ئه‌م فره‌ییه‌ بكات كه‌ یه‌كسانه‌ به‌ شپرزه‌یی و رێگه‌دان به‌ ئاڵۆزی نانه‌وه‌، یه‌كێتی له‌سه‌رێتی خۆی نموونه‌ی سه‌رمه‌شقی چاره‌سه‌ری ئه‌م نه‌زیفه‌ بێت و له‌ شوێنێك رایبگرێت. وه‌كو خۆی سه‌رمه‌شق بوو له‌ ره‌نج و خه‌باتی نیشتمانی و دیموكراسیدا، له‌ كه‌س و هیچ لایه‌نێكیش قبوڵ نه‌كات سلێمانی له‌كه‌دار بكه‌ن.

ده‌بێ خه‌مخۆرانی یه‌كێتی بێژن سه‌ره‌ڕای هه‌موو شتێك سه‌ره‌نجام هه‌ر مۆدێله‌كه‌ی ئێمه‌ سه‌ركه‌وتوو ده‌بێت.

یاسا سه‌روه‌ریی و ته‌گبیری ئیداری و ئه‌منی و خۆگورجكردنه‌وه‌، دیوی دووه‌می دیموكراسییه‌ كه‌ ده‌بێ پیشانی ئه‌وانه‌ بدرێت كه‌ به‌ هه‌ڵه‌ له‌ مه‌سه‌له‌كه‌ گه‌یشتوون.

دیموكراسیی كۆمه‌ڵایه‌تی واتای هه‌ست كردن به‌ ئه‌من و ئه‌مانی كۆمه‌ڵانی خه‌ڵكه‌. بۆ دیوی ده‌سته‌بژێره‌ سیاسییه‌كه‌شی واتای دیموكراسی به‌رپرسیارانه‌.

ستران عه‌بدوڵڵا

PUKmedia کوردستانی نوێ