له‌ سلێمانی ئاماده‌كارییه‌كانی نه‌ورۆز راگه‌یه‌ندرا

.

لیژنه‌ی ئه‌منی سلێمانی ئاماده‌كارییه‌كانی رۆژانی نه‌ورۆزی راگه‌یاند و قائیمقامی شاره‌كه‌ش ده‌ڵێت : هه‌موو ئاماده‌كارییه‌كی پێویست كراوه‌ بۆ ئه‌وه‌ی هاوڵاتیان و گه‌شتیاران له‌ بارودۆخێكی ئارام و هێمندا پێشوازی له‌جه‌ژنی نه‌ورۆز و ساڵی نوێی كوردی بكه‌ن.

ئه‌مڕۆ چوارشه‌ممه‌13-3-2019 لیژنه‌ی ئه‌منی سلێمانی به‌ سه‌رپه‌رشتی ئاوات محه‌مه‌د قائیمقامی سلێمانیو به‌ئاماده‌بونی لایه‌نه‌ په‌یوه‌ندیداره‌كان كۆبوه‌وه‌و پلان  و ئاماده‌كارییه‌كان بۆ پێشوازی كردن  له‌رۆژانی نه‌ورۆز تاوتوێكرا، له‌كۆنگره‌یه‌كی رۆژنامه‌وانیشدا ئاوات محه‌مه‌د قائیمقامی سلێمانی رایگه‌یاند: له‌رۆژی 20 مانگ له‌گردی مامه‌یاره‌ رێوڕه‌سمی پێشوازیكردن له‌جه‌ژنی نه‌ورۆز به‌ڕێوه‌ده‌چێت و چه‌ند چالاكییه‌ك پێشكه‌ش ده‌كرێت. هاوكات له‌ شه‌قامی سالمی شاری سلێمانیش ئاماده‌كاری پێویسست كراوه‌ بۆ پێشوازیكردن له‌هاوڵاتیان و ئه‌و گه‌شتیارانه‌ی كه‌ روو له‌ سلێمانی ده‌كه‌ن، قائیمقامی سلێمانی راشگه‌یاند هه‌موو ڕێوشوێنی پێویست گیراوه‌ته‌به‌ر بۆ ئه‌وه‌ی هاوڵاتیان و گه‌شتیاران له‌ بارودۆخێكی ئارام و هێمندا پێشوازی له‌جه‌ژنی نه‌ورۆز و ساڵی نوێی كوردی بكه‌ن.

ئاوات محه‌مه‌د وتیشی: لیژنه‌ هاوبه‌شه‌كان له‌ رۆژانی نه‌ورۆزدا له‌ ئه‌ركانیان به‌رده‌وام ده‌بن،  ئاماژه‌ی بۆ ئه‌وه‌شكرد بۆ رۆژانی "21-22-23" مانگ كه‌ پشووی فه‌رمییه‌ له‌ هه‌موو شوێنه‌ گه‌شتیارییه‌كان تیمه‌كان ڕێوشوێنی پێویست ده‌گرێنه‌ به‌ر بۆ كارئاسانی هاوڵاتیان و گه‌شتیاران و پێشكه‌شكردنی كارئاسانی بۆیان، قائیمقامی سلێمانی راشیگه‌یاند: له‌ رۆژانی نه‌ورۆزدا مۆزه‌خانه‌ی نیشتیمانی ئه‌منه‌ سوره‌كه‌ی سلێمانی كراوه‌ ده‌بێت به‌ڕووی ئه‌و گه‌شتیارانه‌ی كه‌ دێنه‌ شاره‌كه‌، له‌باره‌ی ئاماده‌كارییه‌ گه‌شتیاریه‌كانیش عه‌لی ره‌ئووف به‌ڕێوه‌به‌ری گه‌شتوگوزاری سلێمانی رایگه‌یاند: هه‌موو ئاماده‌كارییه‌كی پێشوه‌خت كراوه‌ بۆ پێشوازی كردن له‌ گه‌شتیاران و چاوه‌ڕێ ده‌كرێت له‌ رۆژانی نه‌ورۆزدا ژماره‌یه‌كی زۆر له‌ گه‌شتیاران رووبكه‌نه‌ پارێزگای سلێمانی.

PUKmedia راگه‌یاندنی قائیمقامیه‌تی سلێمانی